迪士尼綠色奇兵

香港迪士尼樂園的設施服務部，工種繁多不在話下，工作更是有趣到你估佢唔到，例如維修人員需配備畫筆和氣樽，因為他們隨時要摸黑補油，或跳入河流執行任務。這個有400名成員的部門，像《反斗奇兵》裏最不起眼的綠色士兵，卻是不可或缺的無名英雄；為配合樂園擴建計劃，部門正招兵買馬，下月更有大規模招聘會。自認有技藝又有童心者，歡迎自薦入伍，每月糧餉最少一萬元。 記者：吳淑義　攝影：王子俊


遊樂設施工程經理江鏡泉表示，各部門初級職位皆缺人，歡迎有技藝兼有童心人士自薦。我叫江鏡泉，係香港迪士尼樂園嘅遊樂設施工程經理。我哋部門無論遊戲樂園、兩間酒店、所有道路同埋迪欣湖，總之大小維修都關我哋事，職位諗得到都有，例如園藝、木工、機械、修路等，連專門補油嘅美工隊同潛水專家都有，總之你有乜特別技能不妨自薦，睇下啱唔啱用。

現時每個部門嘅初級職位都缺人，中高級職位視乎應徵者條件而定，一般有中三程度可以加入。學歷唔重要，以技能行先，尤其係迪士尼樂園有嚴格而統一嘅規格，一定要符合到公司要求。


為咗搵人才我哋出盡辦法，除咗登廣告招聘，同事介紹朋友到另一個部門工作都有額外獎金，但同一部門就冇，以免有利益衝突。我哋亦會請暑期工，IVE學生都會嚟做，若果啱用，一畢業就可以返工。我哋對燒焊工都有好高要求，因為好難請到人，試過專登去汕尾船廠挖角。

樂園好注重員工嘅心態，因為呢度係想帶畀客人歡樂，亦想員工做得開心，所以童心好緊要，如果熟悉迪士尼文化，或者性格想令人開心就更加適合。

我哋嘅維修員好多係由其他公司跳槽過嚟，待遇唔會比人哋低，否則點留人呢？薪金要視乎工作經驗而定，但每月最少都有一萬元。雖然唔同崗位有唔同返工時段，但劃一每個月工作195小時，而且計得好均真，過咗五分鐘都會補番錢。由於工種多，同事見到適合工種，學習相關技能都可以申請去做。

維修工作要有上進心同責任心，因為工作關乎旅客的感受和安全，唔能夠馬虎了事。我哋設有「迪士尼大學」，開辦不同課程畀員工進修，提供多種在職訓練。樂園亦有好多晉升機會，但要睇工作表現而定，升職除咗要技藝表現出色，人際關係亦好重要，因為呢度講求合作，過往有同事一邊做一邊進修技能，加上與同事關係好，好快升做管理層。



繽紛的夢幻樂園不許褪色，當璀璨的煙花燃燒後，遊客都盡興而歸。四名美工隊成員此時就拿起畫筆、油漆及噴槍等工具，騎着單車在樂園追逐星光趕工修補耗損，讓卡通人物在黎明前回復「本色」。這份工作學歷不拘，但一定要「好色」。

高級技術員阿Shu（何展舒），他說：「以往做飛機工程維修，其實噴機殼同𠵱家補色工作都有共通處，呢份工最緊要對顏色夠敏感，因為剩係紅黃藍三原色都有過百種，再加埋其他色系就有成千種色，所有色辦都要跟足總美國公司，唔可以有偏差，一定要睇得緊。」

今年23歲Mia（陳幗敏），中五畢業後沒有讀專門課程，但一直做創作工作，數月知道樂園請人，成功加入美工隊做初級技術員。「我哋工作要識得執生，例如顏色曬太陽耐咗一定會變，補色時要順應番，唔可以一成不變，加上夜晚先開工，所以好考眼力。」
===============================================================

又一篇介紹HKDL 鮮為人知一面ge 報導~ 都係園方搵記者入去做訪問~ 不過今次個原因係想係黎緊個招聘會度吸引一班年青人入職~ 呢份工作感覺上同現今香港社會ge 普遍office 工種唔同~ 而且係夜晚開工~

受訪經理都好誠實咁講出... 依家HKDL 所有部門最前線ge 職位都好等人用~ 所以有興趣ge 話就不妨留意一下招聘詳情la~ 記憶中HKDL 個招聘網頁有個function 可以俾大家先將自己resume 同有興趣apply ge 職位放上去等電腦或者相關人士作選擇~ 想加入迪士尼就留意一下官網la~ 越來越多新設施開~ 所有部門都需要更多人手~

上文所介紹到ge 美工隊... 冇錯顏料經過日曬雨淋後係會出現變色情況~ 依家Castle 就係咁la~ 希望會快d 搞返靚仔佢la~