橫琴長隆海洋王國 - (Day 1 酒店 + 馬戲)

如果一直都有睇開呢個Blog, 都知道小弟留意左橫琴長隆海洋王國好耐. 呢個Park 最初預定開幕日期係上年年中, 壓至年尾, 最後喺農曆新年前一星期突然宣佈開幕. 

雖然聽返黎有好多評語都話有好多野未開, 但係由於呢度始終係位於大陸, 預計好快會被同胞玩殘, 所以趁佢剛開幕仲新淨嘅時候到訪, 希望唔會失望. 行程完結之後發現好可能真係因為新開, 所以人流都唔會太誇張. 算玩得輕鬆! 

先講講呢個新主題公園嘅位置, 呢度係珠海同澳門之間嘅一個新開發島嶼 - 橫琴島. 因為澳門大學喺呢度建新校舍, 所以呢個島就變成中澳兩方合作管理. 而橫琴長隆其實同氹仔真係好近, 游水都可以游到過去... 所以橫琴長隆部分地方係仍然可以接收到澳門電訊signal. 

既然橫琴長隆同澳門咁近, 係咪即係由澳門過去會最方便呢? 呢層小弟已經為大家試左, 答案係錯! 起碼暫時呢一刻極唔方便. 

話說連接氹仔嘅橫琴口岸係有四架公營巴士可以到達渡假區, (車程約十分鐘) 但係由於呢度係大陸.... 所以你唔能夠用常理去諗每一件事.... 前往長隆嘅巴士站... 設於高速公路中間! 而現時仍然未有行人過路嘅配套設施, 所以如果你係帶小朋友或長者, 就唔好用呢個方法過去. 好危險.

而如果你係經由旅行社買Package 嘅話, 佢地有機會提供香港到珠海九洲港嘅船飛. 碼頭會有私營接駁巴士 (車程約40分鐘) 直達海洋王國入口. 呢個係較為舒適嘅前往方法. 

而有關離開嘅行程都要預先做足準備. 

因為橫琴島係新開發區, 所以交通網絡非常唔完善, 橫琴口岸八點就會關閘. 而個Park 關門前表演大約七點半完結. 如果你要搭返剛剛提及過嘅公營巴士返去橫琴口岸. 就要去離Park 大約一公里路程嘅公共運輸交匯處上車. 基本上係趕唔到啦. 不過如果你唔係留守到Park Close 又或者會返澳門玩嘅話, 其實呢個方法都唔錯, 因為今次巴士落車位置喺關口不遠處, 起碼唔駛過條高速公路先. 

公共運輸交匯處, 好有迪欣湖嘅影子. 

又或者你可以搭私營接駁巴士去九洲港轉船. (尾班車為20:00, 可趕到21:30 班船, 船程約70分鐘) 

剛剛開幕嘅橫琴長隆海洋渡假區有一個Park, 一個馬戲劇院同一間酒店. (另外兩間酒店已動工) 馬戲表演為每晚20:00 開始, 歷時約1小時30分鐘. 基於上述交通接駁問題, 如果想睇馬戲嘅話, 小弟會建議你住一晚酒店.  

行到呢個位, 其實感覺有啲似置身Resorts World Sentosa... 左邊係酒店, 右邊就係馬戲

佢地有條運河連接長隆橫琴灣酒店同Park. 全長約一公里, 但當然呢程船並唔係免費. 35蚊人民幣, 喺外面睇架船駛過有feel 啲.  

呢張相可以見到條運河一直到Park 嘅正門前. 

馬戲, 依家個show 叫面具前傳 (Prequel of the Mask), 其實今次係小弟第一次睇馬戲, 之前睇太陽劇團同水舞間我都唔當係馬戲, 因為喺我腦海中馬戲係有個馴獸師鞭啲猛獸... 同埋經常都會有小丑出場... 如果你之前係訂左飛就或者經旅行社買Package, 就需要黎到售票處換飛啦, 因為換飛時會出埋座位編號, 呢邊係對號入座. 

戶外車仔檔. 同香港迪士尼一樣. 

因為考慮到交通問題, 所以決定喺Resort Hotel 留一晚, 睇完馬戲就可以返房休息, 第二朝又可以起身去玩. 趁佢新開業真係要試下住. 

越行近越見到好多detail 嘅decoration, 恕小弟唔可能每一個細節都影相post 出黎. 

一入到去就見到大堂嗰幾條海豚. 其實比想像中好. 似澳門賭場酒店. 之前諗點解要將海豚油珍珠色而唔係半透明, 但只要將目光移後幾步就會發現, 似乎佢地係想襯返大堂牆身隻色. 

而且原來有detail 位, 海浪入面有魚群嘅影. 

中間果舊.. 唔知係咩黎, 可能係風水野. 

牆上都有壁畫同細緻嘅裝飾

Check in counter 大堂, 都係以海洋生物為主題. 

 上房了,  一入房就聞到木味, 係剛剛裝修完嘅味道.

洗手間, 大陸酒店真係好興呢種玻璃幕... 其實我唔想訓覺嘅時候望個廁所囉.... 不過可能都係為左俾你可以浸住浴睇電視..... 

 房內都搵到海洋元素

 休息一陣就夠鐘睇馬戲. 著左燈之後又係另一番景象.

個馬戲呢... 我以為會有好多動物, 但佢係以人玩嘅雜技為主. 動物就係得馬 (果然係馬戲). 而且各個表演同面具係絕無關係. 有朋友之前睇過番禺長隆個馬戲團, 話番禺嗰個好睇啲. 就係咁.

而我嘅感覺就係呢個show 嘅表演都好常見, 都係玩下平衡, 表演下魔術, 拋下樽咁樣. 冇乜驚喜. 不過的確係全部外國表演團體黎 (以下呢張係剛剛入場時影, 並唔係呢個show 咁冷清, 其實2700個位都坐得好滿)

睇表演時發現左一樣野, 就係大陸人好踴躍參與, 當然可能都係同佢地唔執輸嘅個性有關 (表演者會以公仔作利誘), 買最貴飛嘅全部都係大陸人, 我坐嗰區都係香港人 / 澳門人, 好靜... 同唔俾反應... 同下面貴飛區有好大對比... 

係一次體驗黎嘅, 但我應該唔會考慮再睇多次, 相反我睇完水舞間之後係覺得如果下次再睇要買最貴嘅飛, 或者你會大約了解我對呢個馬戲表演嘅評價.

繼續發掘一下酒店仲有咩裝飾, 順便食個宵夜就返上房訓.

好好休息, 要入Park 了!