FRIGHT DOME 進駐山頂廣場

香港嘅Halloween 氣氛真係一年比一年強, 雖然香港兩個Theme Park 嘅萬聖節活動內容一年較一年缺少驚喜, 香港迪士尼慢慢淡出黑色世界, 而海洋公園為左每年諗新元素都絞盡腦汁而顯露疲態, 但係整個城市慶祝萬聖節嘅節目的確係一年比一年多. 但係始終都未出現一個真正走驚嚇路線嘅Halloween Party.

終於, 今年香港出現要出現呢個party 了! 位於美國拉斯維加斯嘅FRIGHT DOME 決定衝出美國, 首個落腳點就揀左香港, 其實都幾值得我地自豪. 證明香港個Halloween 氣氛絕不比世界其他地方遜色. 

小小背景資料, 如果大家記得小弟上年去Las Vegas 嘅trip report, 或者你會有記憶Vegas 有一個全室內嘅遊樂場, 位於主大街較偏遠位置嘅一間馬戲主題酒店 / 賭場Circus Circus 內, (小弟當時都係入住呢間酒店, 因為位置問題, 房價較大眾化.) 呢間全室內嘅遊樂場叫做Adventuredome, 而由2003年9月開始, 每年當Halloween 時候就會有一個Halloween 嘅驚嚇Party. 就係FRIGHT DOME 了! 

唔好以為FRIGHT DOME 只係一間鬼屋, 其實佢喺Vegas 大本營係由六間鬼屋, 三個Scare Zone 同眾多個機動遊樂設施組成. 而因為規模龐大, 所以FRIGHT DOME 喺美國都相當之出名. 

今次香港成為全球第二個FRIGHT DOME 所在地, 雖然冇Vegas 大本營咁大堆頭, 但山頂廣場都會被大變身, 總面積將達一萬五千平方米, 會有兩間鬼屋同五個Scare Zone. 聽講要行晒整間鬼屋, 有機會需要半個鐘...

包括兩間鬼屋, 亦有scare zone 同表演.  

備註︰由於場內有不少恐怖的演員遊走以及閃光燈及激光，故十二歲以下的小童不宜入場

睇睇官圖先, 可以預計到呢個Party 會去到咩程度. 

而今日嘅發佈會雖然冇太多香港版FRIGHT DOME 嘅預告, 但都出現部分鬼怪. 唔知兩間鬼屋會係點呢? 好期待! 

仲有即席示範Hollywood 式嘅特技化妝

其實香港兩個本土theme park 所提供嘅Halloween 活動都唔係真正走驚嚇路線, 所以自認膽大嘅人不妨挑戰一下呢個. 我相信如果首年係受歡迎嘅話, 香港山頂廣場都會好似Vegas 咁變成FRIGHT DOME 每年嘅落腳點. 所以如果你同你嘅朋支對呢個活動都有興趣嘅話, 不妨今年嘗試一下真真正正驚嚇Halloween! 

提供一下大家都有興趣嘅資料. 

開放日期 ︰     2014年9月26日至11月2日

開放時間 ︰ 逢星期一至星期日，每日下午3時至晚上11 時 (最後入場時間為晚上10時)

地點        ︰  香港山頂廣場，山頂道118號

入場票 ︰ 港幣$199 (星期一至五每日下午3時至晚上7 時，公眾假期除外)

                港幣$299 (星期一至五每日晚上7時至11 時；星期六、日及公眾假期全日)

特快入場証︰ 港幣$399 (適用於星期一至五每日晚上7時至11 時；星期六、日及公眾假期全日)

售票地點 ︰         門票於8月21日起於快達票售票網(包括各場地票房、K11 Select 及 通利琴行)公開發售

購票熱線 ︰ 31-288-288 / www.HKTICKETING.com