兩個主題樂園情人節

本港經濟儘管不明朗，情侶揮金慶祝情人節毫不手軟。迪士尼樂園與海洋公園埋身肉搏搶情人客，迪士尼首推開業以來最貴的 10,888元情人節套餐吸金，讓愛侶入住酒店最豪的國賓套房度過浪漫一夜，並品嚐大廚首度紆尊降貴到房炮製的情人餐。海洋公園則以包食包玩的一站式情人套餐應戰，男方可在海洋劇場當眾向女友示愛。餐飲聯業協會表示，受情人節帶挈， 2月餐飲收益急升逾一成至 90億元。

77平方米嘅國賓套房喺香港迪士尼樂園酒店只有15間，維多利亞式裝修同一般酒店唔同，氣氛零舍浪漫，平日房租要$6,500一晚。情人節浪漫住宿套票已包埋咁靚嘅套房一晚住宿，皇帝式享受由此揭開序幕。

入住期間，情侶可以喺酒店入面嘅維多利亞水療，享受兩小時由專業水療師提供嘅按摩服務。呢個服務平日要$4,980，當中包括檸薑身體磨砂護理、按摩同埋簡潔面部護理，令人忘卻都市一切壓力。

 

美食可以倍增浪漫氣氛。迪士尼情人節浪漫住宿套票，包埋安排大廚喺房入面即席煮燭光晚餐，主菜係矜貴烤和牛或焗釀鵝肝珍珠雞，由頭盤到甜品，每道菜都係perfect match。

 

入住國賓套房嘅情侶，朝早可以喺國賓廳入面享用早餐，夜晚兩個人仲可以企喺露台，遠眺迪士尼樂園嘅煙花。此情此景，相信會永誌難忘。




海洋公園則以一站式情人套餐搶客，發言人表示，套餐包玩包食，「 1,688蚊好抵」，包括安排旅客到位於海洋館的海龍王餐廳，一邊在 13米闊的巨型觀賞屏旁欣賞海洋生物，一邊共晉晚餐，「仲會安排着禮服嘅威威獅令向女方送花同影相」。在可能情況下，當愛侶在雀鳥劇場「天上王者」欣賞表演時，會安排鸚鵡飛往女方送上鮮花，或安排男方在海洋劇場 3,000名觀眾面前讀出愛的宣言。