This is Mr. B: 熊出沒注意! 香港迪士尼灰熊山谷初體驗

開幕la~ 呢一篇初體驗都終於完結了~ 以後灰熊山谷就正式屬於大家~

今日係Cast Member 入Grizzly Gulch 同樂日~ 係呢度作出少少聲明... 我地有自己方法入到新園區試玩.. 唔代表我地會接受同滿意HKDL 就灰熊山谷MA 預覽日安排~ 因為呢個係我地MA ge 權利~

由於呢個Party 6點半先開始~ 剛剛踏入黃昏呢個時候~ 更加能夠體會到灰熊山谷ge 魅力~ 大家不妨開幕後黃昏入去行一轉~ 好西部feel~!!

口講無憑... 睇相最實際~ 平時大家黃昏影城堡係必定會背光~ 但灰熊山谷個地理位置同佈局令到大家影相不受陽光影響~ 灰熊山峰面向夕陽~ 所以到黃昏時陽光更顯得灰熊山份外金黃~ 假若撞正晴天萬里無雲.. 就會影到以下呢張相~~ 係咪好靚先?

行到去Lion King 個位... 再落去Halloween 鬼屋條路... 就會見到有新ge 牌~ 同Fantasyland 果塊都係差唔多~ 不過match 返jungle feel~

以前入到去係轉左~ 依家左邊封左... 留待Halloween 再行呢段路~ 今次我地向右轉....

轉右就會見到樓梯... 而樓梯後面... 見唔見到灰熊山!?!?

一行到上去... 另一個世界~ 又係WDI 神級功力ge 傑作~ 完全將一個美國西部小鎮重現~ 先唔好講其他detail 位~ 就係灰熊山峰... 再配合埋燈光... 又一個必到影相位~

原來... 灰熊山峰唔只得大灰熊... 仲有隻細灰熊係右邊... 果組蒸汽機後面... 駛唔駛咁仔細??

一入到去就會覺得空間感好大~ 因為呢個區域行人路係處於過山車路軌上面~ 所以其實呢個land 好似用左好大塊地咁~ 但係絕對冇違背到HKDL 善用每一吋土地呢個方針~ 因為全個land 最高ge 建築物就拍到最埋~ 所以你一入到去園區再遠望去噴泉山谷個位... 非常遼闊~

而灰熊山作為地標... 全個land 幾乎任何地方都會見到佢~

而隔離land Mystic Point 個地標.. 呢邊都睇得好清楚~

Walk-through

Grizzly 隨影~ 係讚嘆WDI 功力ge 時候~ 如果你有睇到之前WDI 個訪問... 你會知道你眼前見到ge 事物... 其實都係用d 耐用ge 物料去製造~ 要讚ge 係... 成個land 望落去每一件小事物.. 都好似係用木製造!!

火車入面偷望就試得多~ 企係Grizzly 望返你轉頭~

有人可能會問... 灰熊山谷見到火車經過會唔會係Bad Show 呢? 好抱歉~ 當你入到黎Grizzly Gulch... 你見到ge 已經唔再係Disneyland Railroad~ 而係當年行走美國東西岸ge 鐵路~ 俗d 講句... 一雞兩味.. 有邊個比WDI 有更強ge 想像力??

行過會不斷聽到斷纜聲... 原來就係後退位傳出...

又係WDI 講故事ge 一個證據~ 同Main Street 一樣... 你係見唔到有真馬~ 但係不難發現WDI 加入馬ge 痕跡~ 以下呢個就係馬車痕... 好detail~

一邊有馬車印~ 而另一邊就有大小灰熊腳印~ 同埋狗腳印~ 非常可愛同切合故事!!

我特別愛呢個熊出沒牌~ 好靚~!!!

入到去山谷行左一段路之後就會到達山谷小鎮~ 呢度ge detail 程度真係有Tokyo Disney Sea 咁高質素~ 建築物仔細度都好有說服力~ 令到人相信呢度真係一個西部小鎮~ 雖然... 有好多都只係一個好簡單ge 影相位同玩水區~ 但係高UFO Zone 幾級~ 可以幻想一下Main Street 兩旁建築物識得噴水咁~ WDI 同WDC 都好眷顧香港迪士尼~ 多謝佢地送左灰熊山谷呢份禮物俾香港!!

唔好以為d 建築物只有外形... 因為guest 會行入去jail house 影相~ 所以入面都係show ge 一部分~ Jail House 個故仔似乎係講緊逃犯~ 因為入面好似俾人破壞左咁~

留意三個通緝犯~ 可能會係WDI 刻意放入Grizzly ge 故事同角色線索~

噴泉山谷... 確實係一個detail ge 藝術品~ 入面仲有decoration~ 不過同concept art 相比就好似簡化左同冇咁多水... 仍然提醒大家要小心電子產品~! 相片中見到一條條白色直線...其實係由底噴上黎ge 水柱! 都有機會濕ga!

而間歇泉... 夜景好得!! 仙景一樣

不過日景都唔弱~

噴泉山谷有兩間商店有噴咀射去對方~ 個故事好似就係... 乾貨店同鐵匠錯誤起左間舖係噴泉上面.. 而互相將地下滲出黎ge 水潑 / 射向對方~ 所以就見到呢幾個水壓噴射咀~

優先預覽其實就係... 並非perfect show~ 一直都覺得Dry Good 出面呢個位係有d 野~ 原來係真ge... 而下圖綠色果幅壁畫亦應該未完結~

終於都畫完~

就係講緊呢度.. 有decoration~ 同Main Street 一樣好detail~

而噴泉山谷有一個大型機關~水桶下有條繩... 拉動就會有水照頭淋... 文字上唔明白ge 話~ 可以睇睇以下呢班小朋友示範~

講左咁耐... 終於都要登入灰熊山採礦公司~ 其實一入到個land 都會見識到呢個area 有幾咁detail.. 所以預左等侯區會爆detail.. 而且一早就聽到傳聞話入面會經過好多間房.. 令到你相信自己身處一個舊西部採礦公司~ 包括office (但係行唔到埋去..唔知係咪要人多ge 時候先會開呢條queue 呢... 切割 / 鋸木房... 採礦工人休息室 / locker.. 仲有地質研究室...

一入到去聞到新裝修味~ TSL 同IASW 開幕ge 時候都有呢種味~ 而呢度仲多左木味... 點解ge? d 木係咪真木黎? 好confuse~ WDI 真係估唔到~ 呢個牌似乎係有關一d 動土儀式ge 紀念~ 1888年8月8日~

喺Magic Access 試玩開始後~ 「灰熊山極速礦車」等候區近入口位置一條原本之前封左ge 通道作出左輕微改動~ 遊客需要兜入一間Office 先可以前往sawmill~

WDI 的detail 又再一次出現~ 辦公桌上面出現一罐已開罐頭...

係購自Dry Goods

而地下個痰罐亦一樣...

值得注意ge 係... 辦公桌上ge 萬年曆顯示出8月8日星期三... 雖然1888年8月8日真係星期三~ 但由於多方面證據都顯示出1888年8月8日係呢間公司成立ge 日子~ 所以我唔覺得「今日」會係成立日~ 假設萬年曆所顯示ge 日子並非人為錯誤~ 估計較有可能身處ge 時間... 係1894年...

寄俾老闆ge 信... Capt. Cosgrove... 個名好熟...

冇錯~ 就係Welcome Wagon Street Show 中高高在上ge 小提琴手~ 日日掛住玩音樂不務正業~ 似乎呢個小鎮居民好識享受生活~

繼續向前行~ 或者呢張相令到你有d concept 理解到GG 有幾廣闊~

Detail 的等侯區... 行極都唔到上車位.. 但係就好多野睇... 唯一覺得唔好ge 係... 一號風ge 焗熱天氣下... 熱死人la!! 點解唔可以加風機?? 再熱d 會唔會中暑??

風車鋸~~ 呢個鋸有重點介紹到........ 迪士尼樂園度假區行政總裁金民豪表示，園區設計仿真度極高，「我們有同事從西部買了一部真的古董鋸木機，在園內展出。可見仔細程度無微不至。」古董黎ga!!!

休息室 / locker~ 入面會見到好多props~ 包括工人玩啤牌~ 足見當年美國西部ge 人係點生活~

地質研究室~ 要圍住佢行一圈~ 好好ge 設計!

呢個洞... 原來下面就係有車經過... 仲會聽到有熊叫~~ 好緊張ar!

好多Props!!! 好detail~

要上車la~ 其實一直排隊都覺得好緊張~ 因為係等侯區一望出去就見到一開始落地底個位... 原來係全速鑽落地底ga~ 實在估唔到佢第一下就咁激~

不過上左車後就覺得好好玩~ Space Mountain 係轉到你暈... 我一直都覺得thrill ride 唔係轉到暈就係chok 到你死~ 灰熊山極速礦車完全改變我呢個觀念~ 係好玩!! 睇片吧~ 夜間版本~

日間版本~

睇完片覺得太恐怖? 唔緊要~ 入口都有架礦車俾你影相~

原來仲有一塊布~ 有布料係個land 度就覺得自然同生活化得多~

講完Ride...玩水區同影相位~ 到F&B 同Merchandise~

Merchan 得一架車~ 賣ge 野唔多~ 而且同concept art 都係有出入.. 但係好開心見到HKDL 唔放太多資源喺興建商店度~ 始終西部都係raw raw 地同純樸~ 個故事係d 人去搵錢而唔係去駛錢... 起咁大間商店就有d 奇怪~

灰熊一家三口 (即係ride 上見到果幾隻~) 同埋Lucky~ 係wo... 果個尋金活動都仲未見到有~

我鍾意草帽~ 顏色好有層次!

記得要去買限量版Pin la~~

到F&B 了~ 暫時售賣食品ge 地方只係得呢間Saloon~ 係模型中可以得知... 呢間小食亭個size 其實係同Jessie 個小食亭差唔多~ 但係WDI 以幾座建築物外牆包住Backstage 造成幻覺~ 令到呢個位睇起黎比實際更大~! 又係WDI 努力為HKDL 慳位ge 一大例證~

除左有幾座建築物外牆... 仲會有一排餐桌~ 所以同樣係小食亭... 但Grizzly 比起Toy Story Land 幾張台仔更加似一間餐廳~ 有說服力得多!!

令到呢個區域充滿生氣ge 除左entertainment~ 仲有一張張招紙! 俾到人感覺呢度真係有人住~ Main Street 以前都有呢種感覺.. 不過依家已經冇左.. 變成一座拍戲用ge 大佈景... 希望HKDL 唔好再cut 街頭表演之餘可以加返Dapper Dans

餐桌位比想像中多~ 呢個露天位好有西部情調~ 對面係礦車Loading 再轉落地底果一段路軌~ 不時聽到有尖叫聲~ 但就同外面有少少隔絕ge 感覺~

食物就... 唔多選擇~

個份量同價錢都唔太合比例... 但可取之處係即炸~ 熱辣辣~!

除左有熱氣食物~ 夏天想食冰涼d ge 都有選擇~

一見到呢個啤酒杯就覺得好得意~ 係芒果奶凍黎! 但係隻啤酒杯造型好值得收藏~

自助醬汁區~ 好希望開幕後唔會因為出現混亂同浪費而被迫關閉...他他汁好好味!!

影相時聽到有人行過話... 好靚... 仲靚過座castle~ 真係吹漲~!! 但.... 確實係好靚!!

爆谷車~ 蜜糖芥末味... 好想試一試~

我經常都好想見證呢d 時刻~ 好似見證住一個時代開始咁~ 影到官圖咁真厲害~ 小弟非常明白每位fans 都有佢自己愛好同專業ge 領域~ 例如有網友影Character 一定會捕捉到佢地最靚最magical ge 時刻.. 因為有呢班咁強大ge 後盾~ 令到我可以專心負責返自己ge 領域~ Fans 群唔應該只係得一個人~ 真心感激每一位為香港迪士尼付出過汗水ge 朋友~ 因為你地.. 呢個blog 先有咁多靚相咁多猛料!!

三對喺灰熊山谷出現ge 迪士尼朋友~ on stage 好似一頭一尾分得好開咁~ 但實質應該係冇咁遠ge~ 要讚ge 係... 佢地出現ge 地方都係非常顯眼~ Grizzly Gulch 一進入左建築物群後會感覺好密集~ 而喺呢個咁密集ge 地方... 唯一一個比較闊ge 位置... 就放左Character M&G 出黎~

呢張相稱為... 三熊合照!

Chip Dale 有props~ 我覺得佢地越來越可愛la~

但係我仍然有d 擔心呢班Characters 會唔會最終會靜悄悄地消失... 希望佢地可以長駐la~

而另一個比較擔心ge 就係佢地... Miss Kitty - Welcome Wagon Street Show~ 全live performance!! 好耐都冇呢種令人興奮ge 街頭表演~ 但一次過用咁多performers... 成本應該好高... 希望千萬唔好cut~~! 最多淡季ge 時候就唔好出呢個show~ 而人手可以分配到resort 內其他show~ 等人多ge 時候 (例如weekend 先出黎~)

最初一見到六個performers... 又唱歌又樂器咁專業... 我只係諗到一個字... 「貴」! the Dapper Dans 四個都保唔住... 真係好驚呢個show 不久將來都會成為歷史~

地理上呢個位做show 係唔錯 (Mystic Manor 開幕前~) 因為呢個位係洗手間出面... 處於全個land 比較冇咁繁忙ge 地方~ 而且因為呢度近Backstage 方便出入~ 但如果Mystic Manor 一旦開左... 我估呢個表演地點就會有少少阻塞條路... 之後ge 事之後先算la~ 又或者係Blacksmith 後面Disney Characters Meet & Greet 位置讓路都ok ge~

post 一小段~ 應該唔會點影響大家親身睇呢個show~