Chapter 10A : Disneyland Park

特別企劃黎到壓軸~ Disneyland Park, California Adventure Park 同酒店介紹都會同時update~ 所以都未分到次序~

Disneyland Park 第一篇... 黎到呢度.. 你會發現呢度每一吋地方都有Magic!! 估下我第一個見到嘅Disney Character 係邊個??? 其實唔知成件事來龍去脈... 應該係Pinocchio 摘左朵花但俾Greeter 話佢跩.. Pinocchio 發脾氣要再摘... 我行到埋去只係聽到Greeter 話Minnie 種得好辛苦, 佢知道你亂摘一定會好傷心~ Pinocchio 就乖乖收手



隨即見到第二個Character... 喺DLR Character 都有隊要排~ 但都係短queue~ (除左Toontown Mickey House). 而呢邊都唔會有一個特定位置俾某一個character... Greeter 截完queue 後character 真係會離開而非好似香港咁轉個頭就返~ 好彩greeter 都好樂意提供資訊話你知你想影嘅人物會係咩時候大約咩位置出現!

Extra Magic Hour 黎到Disneyland 個策略就同DCA 唔同... 呢邊有50個ride / attraction... 只要當日個park 唔太full, 大多數流量大嘅知名設施都唔會見長龍~ 所以今朝呢個鐘要K.O 嘅會係Fantasyland 五個流量低, 冇Fastpass 嘅經典設施. 而DL 同DCA 最大分別係呢邊EMH 只會開Fantasyland 同Tomorrowland.. 所以其實都多人...

一穿過成堡又遇見神奇的一幕... 我只係入左黎十分鐘已經愛上左呢度!

Fantasyland 五小強之一. Peter Pan's Flight (點解稱為五小強? 因為五個細Ride 連成一線.. 受歡迎程度勁過所有E-Ticket ~ 你話強唔強?) ) 位置係HKDL 部分Winnie the Pooh ride + Pooh Corner

PPF 係一個每架Vehicle 只可容納兩個人嘅超低流量ride~ 所以必定要喺EMH 玩! Wait Time 20 mins 已經算短, 呢個blog 應該好多朋友都玩過, 總之就係一個字 - 靚! Disneyland 一個非大型但極受歡迎嘅D-Ticket Ride. 如果你唔知呢個ride 係咩樣~ 可以上youtube 睇片, 原屬HKDL 開幕設施, 盛傳上海迪士尼開幕都會有佢. (為左完全投入, 小弟上左車之後都收埋相機~ 可自行Youtube search POV)

然後就係過另一邊玩Snow White's Scary Adventures, 位置係HKDL 部分Royal Banquet Hall 範圍, 老實講... 雖然係Disneyland.. 原來除左PPF 外其他幾個Ride 仔氣氛都幾沉重! 我玩都有少少怯... 有傳呢個Ride 原本個名係冇Scary 呢個字.. 因為嚇親小朋友所以要加返佢...



五小強之三 - Pinocchio's Daring Journey.. 位置係HKDL 部分Royal Banquet Hall + 部分Mickey's PhilharMagic

睇到個名又知道係有少少驚嚇成份~ 不過呢個係Pinocchio~ 小弟一定唔會覺得唔好玩~ 所以無論我講咩都唔重要~ 哈哈

Mr. Toad's Wild Ride.. 呢個ride EMH 時候只需5分鐘... 但因為我要玩多兩個Ride 先返黎~ 所以要同Day Guest 迫... Wait Time 係10分鐘! 哈哈. 位置係HKDL 部分Winnie the Pooh Ride + 旁邊洗手間位置

呢個Ride 其實冇乜誠意... 入面冇立體AA... 全部都係簡單擺動嘅平面道具... 唔怪得冇人玩~

你會發現原來Winnie the Pooh Ride 係有其獨特性... 呢邊d ride 都要家長指引的.. 呢個Ride 最後會遊地獄... 我架Vehicle 撞完火車後咁岩停左喺地獄scene 入口半分鐘!! 有d 淆! 哈

五小強最後一個Ride 係Alice in Wonderland.. 佢連埋Tea Cups 位置係HKDL Festival of Foods~ 特別之處係有戶外部分~ 原來架vehicle 不知不覺會上左二樓.. 一出返Outdoor 就係上面.. 再跌跌撞撞落返黎.. 都幾特別~ 而我個人覺得Queen of Hearts 同班士兵scene 做得好好

講到呢度你可能心入面已經存在一個問題.. 點解DLR Fantasyland 可以起到咁多ride? 又點解size 明明同HKDL 差唔多但可以有50個ride? 小弟愚昧地認為係同佢地開幕初期個setting 有關... 1955年開幕嘅加州迪士尼樂園喺attraction queue 處理上闊度只係夠容許一個成年人企.. 呢張相show 到... 超級窄

當年佢地冇考慮到殘疾人士需要... 部分等侯區如Jungle Cruise 更加係要兜埋樓梯上二樓~ 呢個setting 大大縮減等侯區範圍但又能夠容納到大量guest~ 香港迪士尼呢類新park 就要合乎新規例.. 等候區闊度需要容納一架輪椅再預多d 位人行~ (灰熊山谷條Queue... 如果根據加州呢種劃法.. 隨時可以起多個ride...)

咁殘疾人士點算? Disneyland 又點會俾呢d 歧視嘅事發生~ 佢地更加可以享有特權直接去Unload 位上車~ 就係呢個將錯就錯嘅慳位做法.. DLR 神奇地壓縮大量空間起更多Attraction.

完成Fantasyland 五個D-Ticket ride 後.. 仲有一個dark ride 要玩... 位於樂園掘頭路園區Critter Country 的Winnie the Pooh.. 咁早冇人行到咁入, 所以直接上車

同香港版故事編排唔同~ 都有部分AA 係香港版欠奉~ 但我覺得香港 (即Magic Kingdom 版) 個故事比較忠於原著~

EMH 唔玩Fantasyland Dark Ride 我都可以推介你玩Tomorrowland Finding Nemo~ 詳情請睇Chapter 5

離開The Many Adventures of Winnie the Pooh 之後... 一出去exit 就會見到另一個ride~ Splash Mountain~ 當然又係要做定濕身準備~



而呢個咁受歡迎嘅ride 都有Fastpass 同Single Riders 兩條隊~~

上次講左DCA Fastpass.. 今次講一講DL 呢邊會提供FP 嘅ride~

Autopia (人多日子先會有)

Big Thunder Mountain Railroad (人多日子先會有)

Haunted Mansion Holiday (只限Holiday 版~ 即怪誕城之夜版本.. 正常版冇FP)

Indiana Jones Adventure

Space Mountain

Splash Mountain

Star Tours: The Adventures Continue

沒有聯繫上System 的 FP: (如果唔知道呢句句子咩意思~ 歡迎睇返DCA 篇)

Roger Rabbit's Car Toon Spin
今次再講埋Single Rider 設施... 其實Disneyland Park 入面得Splash Mountain 同Indiana Jones Adventure 有Single Rider... 個人覺得雖然有人陪玩係會開心好多~ 但除非你留喺Resort 有足夠時間.. 否則冇可能玩得晒.. 何況Single Rider 都係一齊排隊.. 到上Vehicle 果一下先分開一陣... 不妨考慮一下慳時間地排Single Rider~

Splash Mountain.. Single Rider 坐得嘅位都係最後一排.. 所以甚至唔需要擔心會太濕.. (當然坐你前面嘅人都要有返咁上下身型先擋到水~) 同Grizzly River Run 就相差得好遠... 呢個可以輕微濕離場. 都係一個非常經典嘅ride~ 有刺激度但亦能夠適合全年齡, 希望HKDL 會起, retheme 都唔緊要~ (唉... 當年Pirate Coast 入面就係會有retheme 左嘅Splash Mountain... 又要再一次唔開心...)

繼續向大路掃出去, 另一Classic Ride - Haunted Mansion, 呢個ride 去到呢種淡季等侯時間都係10分鐘以內. 基本上都係直入..

Halloween 同Christmas 時會改做Jack Skellington 版本~

香港迪士尼Haunted Mansion 一波三折... 最後變成Mystic Manor (當中更包括建於Pirate Coast retheme 左做Voodoo theme 的版本), Haunted Mansion 確實係比Mystic Manor 驚~ 不過驚得黎並唔恐怖~ 又係用黑暗環境同sound effect 營造氣氛~ WDI 好勁!

繼續行返出大路就會到達Pirates of the Caribbean~ Wait Time 顯示15分鐘, 雖然係排到出黎~ 但影完呢張相過左橋後... 小弟剛好被CM 指示行去左邊另一條新開嘅queue... 一上去就到indoor.. 最終等左10分鐘就上到ride

呢個ride 特別之處係... Audio Animatronic 全部都做得好細緻同動作流暢, 入面好多個Human Figure... 個個都做得好似真人, 可能只限於觀眾呢個距離同角度~ 但已經覺得Disney 好勁...

玩完出黎就入左New Orleans Square 內街.. 我覺得呢度真係好靚.. 呢邊只係幾間商店同餐廳.. 還有Fans 們都聽過的Club 33 同Dream Suite.. 憑小弟能力帶唔到大家入去~ 黎到門前已經好好 (有關Disneyland Park 小秘密, 小弟決定開另一篇講)

只係喺相見到嘅樓梯~ 終於可以親眼見到!!! 呢個corner 好靚呀!!

New Orleans Square 當然會見到Tiana 出現~ 基本上佢都係長駐~ 行過幾次都見到佢企喺呢個區唔同地方~

行到呢度... 係時候醫醫肚食個Lunch.. New Orleans Square 同Frontierland 交界有間餐廳 (或者可叫小食店) 售賣Fish and Chips. 就好似香港間Lucky Nugget Saloon 咁買完喺出面搵位坐. 不過DL 呢邊睇嘅就係Frontierland 湖景~ 好寫意!

有不同醬汁俾你揀~ 小弟喺他他汁之外再外加Honey Mustard... 好好味呀!!!!!!!!!!!!!!! (放心... 小弟唔會另加一篇介紹美食~) 有一個現象想同大家分享一下~ 喺整個旅程見到所有美國 / 加拿大人食快餐後都係自己收拾同處理, 例如相中膠籃會放喺垃圾桶上面, 再幫手清理埋張檯先走~ 我覺得呢種公民責任係由細培養出黎... 根深柢固先會自動自覺去做... 不妨嘗試學習一下~

食完行過去Indiana Jones.. 見到Jasmine 同小妹妹討論緊Tree House 上景物~ 我以為Jasmine 都會好易撞見... 但呢次係我唯一一次見到佢喺Park 入面出現... 冇時間同佢合照... 所以大家做planning 時要諗諗你去個首要次要目標係乜.. 呢邊有好多好多Characters... 如果你想同晒咁多位Character 影相... 有機會要花一整日時間...

Indiana Jones Adventure 有Fastpass 同Single Rider. FP 就喺相中呢個位拎~

不過有一個Tip 俾大家~ 如果你見到Wait Time 只係20分鐘~ 不妨考慮一下排Standby~ 因為呢個ride Merge 位(即收FP 將兩條隊合併) 係位於進入Indoor 前...



即係呢個位.. 入面都仲要兜多五至十分鐘先上到車... 等一個鐘返黎再等多十分鐘, 又或者一次過等二十分鐘~ 可以衡量一下

佢個waiting area 超誇張的大... 入面有interactive 元素~ 呢樣野係HKDL 暫時欠缺~ 不過相比起所謂interactive 野... 我更想佢起呢個ride.. 好好玩!! 如果你未玩過, 其實佢係一個搖晃得好厲害, 有些微離心力又有少少速度嘅ride~ 未去到過山車咁快~ 亦又未搖到好似Star Tours 咁... 文字上好難解釋~ 總之就係好玩!! 我玩左兩次! 記住呢個ride 都有Single Rider~ 可以一試

Indiana Jones 旁邊就係Jungle Cruise.. 兩個ride 迫近得無話可說, IJA Fastpass 更加喺JC 度拎... 見到二樓有人嗎? 等侯區用晒成個碼頭! 可以排好耐



由呢個ride 可以睇到呢邊CM 有幾enjoy 佢地份工, 唔知大家有冇喺HKDL 遇過瘋狂同投入嘅船長, 小弟喺香港見過一個. 全程投入叫到聲沙, 唔係想抹殺其他船長努力, 但暫時的確遇唔到有其他船長比佢更熱愛佢個角色. (佢仍然喺HKDL 仍然熱愛呢度, 但依家唔會再聽到佢講船...)

喺DLR, 小弟只係隨機地上左艘船... 唔知係唔係我幸運, 我遇到一位同樣投入嘅船長. 而且佢玩得開心過我地. 如果連自己都唔娛樂到, 又點去娛樂人? 香港CM 咁唔開心, 到底邊度出左問題?

Aladdin! 之前冇同Jasmine 影, 今次要影一下佢!

敬請留意Part B