走進《大夢想家》的世界──迪士尼粉絲聚會後感

有幸得到Walt Disney Company(Asia Pacific) Ltd.的邀請，出席今次嘅活動。喺呢個活動入面，除咗有機會同來自華特迪士尼檔案館嘅檔案員Justin Arthur先生見面，聽到佢以華特迪士尼先生嘅生平同埋華特迪士尼公司嘅發展為主題嘅一個分享之外，仲能夠見到佢專程由美國帶來香港嘅十樣珍貴收藏品。部分收藏品甚至極具歷史價值。其後更能率先欣賞到由Tom Hanks 同Emma Thompson 主演嘅電影《大夢想家(Saving Mr. Banks)》。





於分享當中展示咗唔少同華特迪士尼有關嘅圖片同收藏品。例如華特迪士尼先生既手稿﹑電影海報﹑廣告﹑產品等等。當中播放咗係華特迪士尼先生於1923年製作，名為”Alice’s Wonderland”嘅默片。當中原來已經用到《歡樂滿人間》所用到嘅類似技術，將真人片段配上動畫。以下係於網上搵到既片段。可見華特迪士尼先生於電影製作方面一直都敢於創新。



https://www.youtube.com/watch?v=e8CeFmxl5zs

以下將逐一介紹。首先第一件係1934年由英格索爾公司製作嘅米奇老鼠鬧鐘。米奇老鼠自”Steamboat Willie”上映之後一直大受歡迎，因此衍生出唔同類型嘅產品。呢個嘅鐘面係以米奇老鼠雙手做指針，側面印有其他角色。從佢嘅鏽跡相信各位都可以明白到佢年紀有幾大。假如我係當年嘅一個小朋友，見到呢個鬧鐘，相信我一定會被佢吸引住。



之後就係兩件《雪姑七友》喺1938年於上海上映嘅印刷品，分別係電影場刊以及用來自製布偶公仔嘅紙樣。當時一本場刊只售兩毫，但裡面內容卻包羅萬有。例如整個故事嘅流程，樂譜以及使用白雪公主做代言嘅拖肥糖廣告等。而紙樣則是俾當時嘅人用作自製小型cushion。但可能因為主要係中國銷售，白雪公主個樣同衣服配色都比較中國風。不過第一眼望見兩個相反嘅博士紙樣，我覺得有啲似貼門神，哈哈！



之後時間一轉，就到一件1955年嘅收藏品。係最令我印象深刻嘅，有華特迪士尼先生親筆簽名嘅《小姐與流氓》故事書。根據Justin所講，而家見到嘅華特迪士尼標誌及商標，就係以迪士尼先生嘅親筆簽名作藍本。 呢本書雖然未及其他收藏品年代久遠，但當我見到迪士尼先生嘅親筆簽名，好似將我同佢拉近咗一大步。



1955年同時係標誌性嘅一年。因為係位於加洲嘅美國迪士尼樂園開幕嘅一年。以下一件係當年迪士尼樂園嘅第一張門票嘅複製本。據聞當年使用呢張門票嘅，就係華特迪士尼嘅哥哥Roy Disney。當年迪士尼樂園開幕係非常轟動，除咗因為當年未有主題公園呢回事，迪士尼樂園係第一個以故事為題嘅遊樂場之外，本身華特迪士尼先生所創作嘅電影亦係街知巷聞。因此迪士尼樂園係深深地影響全世界。



第七件收藏品係1963年香港出版嘅101斑點狗漫畫。Justin話呢本漫畫係第一次回到香港展出。雖然聽講好似有另一位檔案員於幾年前另一次活動中帶過來香港，但今次能夠再次帶呢件收藏品返嚟香港俾咁多位Fans親眼見到，都係一個難得嘅體驗。



今年適逢《怪誕城之夜》上映20週年，Justin亦都可能因為咁而帶咗呢一個南瓜來香港。呢一個南瓜係於Jack Skellington 唱出”Jack’s Lament”一曲中出現。呢個南瓜好可能只係喺電影中出現咗唔夠半秒嘅時間，全因為呢一套電影係定格拍攝，每一格都要需用到唔同造型嘅佈景以及雕像，先可以做出動畫嘅錯覺。



接下來係三件比較近期嘅電影道具，分別係：《愛麗斯夢遊仙境》中，瘋帽子以前一個小女孩拍檔所穿戴嘅帽子；《創戰記》中，反派使用嘅雙截棍道具；以及《魔境仙縱》入面，寶庫中使用嘅金幣道具。當中金幣道具上既肖像，正是《綠野仙縱》嘅作者L. Frank Baum。雖然喺電影中唔會近鏡影住堆金幣，正常就唔會見到上面嘅肖像，但從中可以知道華特迪士尼公司於製作電影中永遠都係咁仔細認真，更會向原著作著或有關人士致敬。



由於今日主題係《大夢想家》呢套電影，而當中以電影《歡樂滿人間》嘅製作過程為故事嘅重心，所以Justin都喺分享中加插咗唔少有關呢套電影嘅歷史資料。有部分角色設計草圖都有喺電影中重現返。



分享之後，經過一輪合照同發問環節，我哋就開始欣賞《大夢想家》。

大多數於香港上畫嘅外國電影，譯名都只係根據電影介紹而定。所以今次套戲嘅中文譯名所提及嘅「大夢想家」，應該只係指華特迪士尼先生。但睇完呢套電影後，我個人認為譯名反而有無心插柳嘅效果。電影中嘅「大夢想家」並唔止係華特迪士尼先生（Tom Hanks飾演），同時電影《歡樂滿人間(Mary Poppins)》嘅原著作者，P. L. 卓華斯女士（Emma Thompson飾演）都係一位「大夢想家」。冇佢編寫呢一個動人嘅故事，都唔會有一套咁美妙嘅電影出現。因為製作《歡樂滿人間》呢一套電影，並唔止係華特迪士尼先生為兌現對兩個女兒許下了二十年嘅承諾，更加同P. L. 卓華斯女士一個埋藏心底多年嘅心事有關。

至於呢個心事係咩？恕我未能劇透，想知嘅話記住喺2014年1月31日之後到戲院觀賞《大夢想家》喇！喺睇呢套戲之前，建議先睇一次《歡樂滿人間》，你將會有更深共鳴。我本身因為Supercalifragilisticecpialidocious呢一首歌而愛上《歡樂滿人間》，但當我睇完《大夢想家》後，先至發現原來呢一套主角們開心快樂地載歌載舞嘅電影，背後嘅故事係感動得足以令人落淚。