Paint the Night Parade 與哈囉喂2014

今日香港迪士尼處處通網站突然宣佈加開今個月25 同26 兩日俾白金同金咭會員優先睇全新Paint the Night Parade, 16號公佈25號加場, 咁遲先公佈部分會員可能已經有節目而未能抽空參與. 而更特別嘅係呢幾日有幾位朋友相繼話佢地去香港迪士尼樂園同海洋公園嘅試玩日子撞期. 如果兩者只能揀一個嘅話, 應該點揀好. 

(先唔理FRIGHT DOME, 因為暫時都冇乜資料) 我會推介去海洋公園哈囉喂. 

首先要利益申報一下, 唔好以為小弟只係出席首場Paint the Night Parade 公演所以覺得OP 有新鮮感, 其實大家都應該記得小弟有報導過海洋公園今年哈囉喂嘅Press event, 所以今次兩邊都有報導過, 以持平態度分析. 而大前提係HKDL 同HKOP 只能二擇其一嘅狀況. 有全年證同其他證嘅各位朋友, 又唔撞時間嘅話咁就冇呢個煩惱. 可以兩邊都去晒. 

今個秋冬香港迪士尼活動嘅最大賣點就係加入全新夜間巡遊, 但係Paint the Night Parade 唔只出得一年, 未來嘅五年甚至十年大家都可以入場睇到... 唔需要急於一時三刻... 

而今年第二個賣點係原野劇場改裝成Halloween 版本 - 亞馬遜驚魂. 呢個雖然係seasonal 嘅表演, 但係大家回想返過去香港迪士尼嘅做法, 如果呢個表演口碑係好嘅話, 下年必定會再出. 而如果因為唔受歡迎而下年唔再出嘅話, 其實唔睇亦唔算係一個損失... 就呢件事早幾日小弟喺專頁度做左一項好簡單嘅非正式調查.... 有興趣可以上去睇返. 

唔好誤會, 我唔係話HKDL 做得唔好, 而係見唔到有迫切性非入場不可. 個人認為要諗入園理由嘅話, 最大誘因會係把握機會回味一下迪士尼式鬼屋, 過去幾年好明顯地睇得出香港迪士尼已經一步步淡出驚嚇黑色世界. 從而發展更多元化嘅秋天活動. 下年馬戲班踏入第五年, 而學院都第四年, 但預計兩間鬼屋都敵不過十週年慶典呢個風頭. 個人猜測只要十週年係冇延期嘅話, 下年Halloween 氣氛會再進一步萎縮... 而2016 嘅事.. 太遙遠了...

 

海洋公園哈囉喂, 我係真心覺得值得支持. 今年睇得出D 鬼嘅造型同化妝都認真左. 鬼屋場景亦比以往做得仔細. 殭屍LIVE 個氣氛真係做得好出色, (可能係因為電影嘅關係更令人容易代入...) 唔好嘅地方係鬼屋數量比以前少, 但我相信呢個blog 嘅讀者們並唔係著重數量嘅一群. OP 今年鬼屋質素的確係好左. 

同埋海洋公園都決意要發展合家歡Halloween 主題, 今年有三間輕量級Halloween 主題walk through 俾小朋友玩. 當中包括Doraemon.... 

講得太多好說話就變打手, (雖然大家都知我唔係). 但我都承認我真係對香港迪士尼特別嚴苛.... 

暫時未知道FRIGHT DOME 嘅鬼屋會係點, 亦都唔知對海洋公園將來哈囉喂嘅發展方針有冇重大影響. 希望係正面啦.