迪士尼樂園空降香港七年，是年輕人夢想的國度，但在最低工資的影響下，終於爆發了逃亡潮。
迪士尼樂園，童話與夢的國度，七年前空降香港。當年一場「尋找奇妙力量」的招聘會，吸引大批追逐夢想的年輕人成為樂園的一員。然而七年後的今天，樂園依舊、人面全非，員工不斷流失，甚至連一輪輪的招聘大會都人流冷清。為了探索究竟，《蘋果》派出記者，成為樂園內的職工，展開長達一個半月的卧底調查，去揭開這幕迪士尼樂園逃亡潮的秘密。
今年5月《蘋果》記者透過招聘會應徵，獲聘成為迪士尼樂園的職員，7月初上班，直至日前離職，在這一個半月的時間內，記者被安排不同的時段上班，其間結識了在不同崗位工作的員工，同樣在這個半月內，記者所在部門的同事，有八人辭職，佔員工總數約25%。
在好萊塢酒店米奇餐廳任職的阿強（化名），20多歲，九個月前由海外大學畢業回流入職侍應，半年後就晉升為部長，相比身邊工作了六年始獲晉升的同事來說，猶如坐上直升機，但他仍選擇「遞信」。
同事們選在米奇餐廳為三名離職的部長辦告別派對，對這個曾付出汗與淚的地方始終難離難捨。
無包飯無飯鐘無交津
「升職先加嗰千幾蚊，就算再升一級到組長，都只係得萬三、四蚊，但要再升好難！」現時，有市區的餐廳連萬三、四蚊請洗碗工都請不到。去年底，阿強辭職，但被挽留，「經理話2月有成20日花紅，我咪留低囉，到家職都升埋啦，但乜花紅都冇」他苦笑說。
餐廳內的侍應月薪9,000元，七年來起薪點一毫子未加，現時比市面同級職位平均低千多元，比起酒店餐廳更低近三、四千元！資深員工透露，加薪是每年平均二、三百元，年終花紅約半個月。而貼士則每月平均只有百多元，加上「三無」，無包飯無飯鐘無交津，相比市面任職餐飲包飯是基本福利，貼士上千元來說，月入至少差三、四成。
人工低福利差又看不到出路，士氣低落是意料中事，記者入職僅兩周，陸續有人離職，單是米奇餐廳便有四名部長、一名組長和三名侍應離職。記者曾參加三名部長的告別派對，充滿欷歔無奈的感覺，原來又有三名員工準備辭職。
在米奇餐廳，員工不斷流失，有人向記者說：「同我同期嘅都走晒啦！好無癮！」加上臨近開學，實習生即將離任，人手更是捉襟見肘，留任的員工，工作量倍增，眾人公餘話題離不開另覓出路，整個樂園瀰漫着一股逃亡潮。
迪士尼樂園職工會發言人指，自最低工資實施後流失率高企不下，尤以餐飲部為甚，「始終人工低過外面一兩成，公司又採拖字訣，剩係話考慮調整！」她說不單餐飲部，其他部門流失率一樣嚴重，像過去兩個月，樂園30多名保安最少走了一半，就算招聘也未及「止血」。
餐飲部不包飯鐘錢，只有清潔工獲發飯票。有員工埋怨，樂園一碟炒飯最平25.5元，吃飯月花逾五百元。香港餐務管理協會主席楊位醒也驚訝︰「行規包飯係百分百，否則好難請到人。」
員工跟米奇娛賓自嘲如「破地獄」。
高溫下高飛狗穿戲服落水。
高飛狗戲服濕透更重。
工會9.5聯署爭飯鐘
迪士尼職工會秘書吳冠君指收到不少員工投訴無飯鐘，但公司未持開放態度討論，「我哋返成日，食飯係必須嘅，迪士尼又與世隔絕，冇其他選擇」。據悉，9月5日，職工會將發起簽名運動，正式與公司談判，爭取包飯或飯鐘錢，「一係包飯，一係畀飯鐘，要求一啲都唔過份！出邊度度都至少有一樣！」
去年獲美國《財富》雜誌選為全球最令人佩服公司第14位的迪士尼，於創意、管理質素和社會責任等獲高度評價，如今面對逃亡潮，樂園回覆稱，他們的流失率跟同行相若，他們會持續進行招聘會，以確保有足夠人手服務賓客。
心淡離職 逃亡者心聲：行咗寃枉路
迪士尼好萊塢酒店米奇餐廳年資逾六年，最有經驗的部長，日前離職，他見證了米奇餐廳的成長，「初初人手比家多兩成㗎！請人又嚴格，起碼要對呢行有啲認識！家根本冇人肯制，咪有手有腳就話請囉！」
六年前因為憧憬迪士尼的童話與歡樂氣氛，毅然放棄月入16,000元的高級侍應工作，加入只有10,700元人工的迪士尼大家庭。80後的他自言對迪士尼情有獨鍾，自少看迪士尼卡通長大，所以薪酬減了一大截也沒所謂，反正深信當時的行政總裁羅彬深所說，樂園有完善的培訓和晉升機會。
迪士尼今年5月招聘日人潮疏落。
05年樂園開幕多人爭應徵。
人手不足影響服務
「想提升自己，覺得喺大企業做可以學到嘢。初時開工好開心，成班年輕人一齊嚟咁靚嘅環境做嘢，客人質素又高，所以冇壓力」。但六年下來，職級沒有升過，人工也只加了2,000多元，比六年前離職時的薪酬仍少達3,000元。「公司咁多年調整薪酬不力，留唔住人，人手流失好似走馬燈，直接影響服務質素」。
人手不足，賓客投訴倍增，同事更怨聲四起，他作為「受靶」的小頭目壓力頓增，這正是他辭職主因。「好彩係五星級酒店搵到份侍應工作，人工返番以前水平，就當呢六年投資錯誤，行咗寃枉路」。他祝願仍在默默耕耘的同事好運，成功向公司爭取應有福利。
今非昔比 開幕招聘墟冚 今年冷清
迪士尼樂園於05年9月12日正式登陸香港，這個充滿夢幻的童話世界，曾是不少求職者夢寐以求的首選好工，開幕前舉行的3,000人大型招聘會，更一度因應徵者太多引致官方網站大塞車，而面試場數也因為反應踴躍而需加開。
當時樂園打算聘請500名娛樂演藝人員，包括舞蹈員、巡遊隊員、音樂師和迪士尼朋友等，但收到的申請卻超過三千份。面試者要突圍而出，必須過五關斬六將，跳舞體操樣樣皆能，還要有急才和應變能力。當時一名應聘者更滿腔熱誠向記者說︰「我覺得可以扮米奇或者唐老鴨都係一份光榮，只要可以喺迪士尼做嘢就係我夢想！」
卧底 T恤短褲凉鞋見工
時至今日，記者參加5月24日在迪士尼酒店舉辦的招聘會，偌大的會議室裏只有數十人，場面冷清。參加招聘會前，有員工報料指迪士尼餐飲部最缺人手，長期招聘都乏人問津，故不論甚麼人應徵，他們都會聘請。
當日記者故意以 T恤短褲配凉鞋的「不認真」裝扮面試，應徵二級款待員，即餐廳侍應。由填表到面試，過程不足半小時，一份印有名字的合約便放在記者面前。毋須出示任何學歷或工作證明，只須填完表簽過名，記者便正式成為迪士尼好萊塢酒店內米奇餐廳一名全職侍應。
卧底親歷員工苦況 颱風兩夜宿「殮房」
在加入迪士尼樂園之前，記者接到多個樂園員工的投訴，大多是形容工作的辛苦與疲累，7月4日，記者終於成為迪士尼好萊塢酒店米奇餐廳的一員，在上司、同事的教導下，記者學會了托盤、水吧、餐桌禮儀、更學會了無論如何忙碌、疲累，都緊記着將歡笑、快樂，帶給每一位走進餐廳的顧客。其中讓記者難忘的是，颱風韋森特、啟德襲港期間，與樂園員工共度風雨的日與夜。
由於樂園位處偏遠，從市區冒着狂風暴雨上班實是「搵命博」。樂園對此有特別安排，例如調出酒店房間予有需要員工休息梳洗，以應付翌日工作。記者經歷了兩次颱風，聽到可「上房」十分雀躍，但身邊同事竟耍手擰頭，寧願冒着風雨回家，「你以為好舒服？大床呀？瞓殮房（會議室）咋！」原來讓員工留宿的酒店房不多，而且女員工優先，男員工就只能找地方打地鋪。
7月24日的十號波吹塌不少樹木，更封鎖了迪士尼通往外界的馬路，記者上早班，得知當晚夜更同事全部無法離去，被迫留宿。翌日回來，各人七嘴八舌，「全部人打地鋪，連被都唔夠！個地下又硬又凍，個個起身面青口唇白，成條喪屍咁」。
8月16日颱風啟德襲港，記者終於能和同事們一起睡在他們口中的「殮房」了，真是難得的經歷。這次選擇留宿的人約10人，兩名女員工獲「上房」安排，但未幾她們又跑了下來，趴在餐桌上，「間雙人房瞓咗8個人，我寧願喺度瞓！」
【人肉雪條機】
因雪糕機故障，餐廳要求女侍應手捧雪條奉客。
要求侍應用布抹杯
記者隨着其他男同事去了「殮房」，發現已有被和床單，但地上真是又硬又冰冷，無法入眠。身邊同事索性起來玩紙牌，看電腦，有人更猛做掌上壓務求令自己倦極入睡。
直至清晨6時，要當早更的同事匆匆在地上躺了半小時就上班去。事後，女經理無奈地安慰徹夜未眠的記者：「呢度好好呀！做人要知足啊！仔！」
記者工作的餐廳主要提供自助餐，侍應的工作包括擺放餐具、收碟和「飛垃圾」（將客人用過的餐具吃剩的食物搬往廚房），碟很重，10隻碟托起來相當吃力，餐廳開張7年，很多東西變舊老化卻不更換，增加員工的工作量。
每晚兩輪自助餐後將樓面擺設妥當後，便到「執手尾」時間，此時必然聽到有人爆粗，原來又在投訴洗碗機，「部機壞咗整唔好，又唔捨得換，晚晚咁抹，但根本抹唔乾淨，抹完都仲係污糟！」幾百隻水杯，大家抹個不停，同事說，洗碗機由開張至今使用7年，水杯經清洗後仍是佈滿污迹，多次維修情況依舊，管理層遂要求侍應將水杯逐一用布抹乾淨。
但其實是一個不可能的任務，餐廳部長說外面的餐廳每季會用漂粉漂洗水杯，才能去除難以清洗的污迹；用布抹其實只為抹走水氣，絕不能真正清潔水杯。記得有一次「 VIP」（樂園行政總裁金民豪）到訪用膳，同事在數百隻水杯中千挑萬選，仍拿不出10隻光亮如新的水杯，「咁大間公司10隻乾淨杯都冇」。
【被迫偷冰】
由於廚房製冰機故障，員工需待客人入睡後潛進酒店客用自助製冰機取冰。
【集體抹杯】
洗碗機老化，令員工要用布抹杯，邊抹邊呻苦。
半夜潛入酒店偷冰
另外咖啡機、雪糕機及製冰機亦壞個不停，其中雪糕機已故障近一個月，不少客人投訴沒雪糕吃，管理層才提供雪條「頂住先」，但又怕將冰櫃放出樓面「肉酸」，要求女侍應手持一盤雪條充當「人肉雪條機」。
由於咖啡機無法正常冲出一杯泡沫咖啡，要額外多重工序方能完成。廚房內的製冰機亦無法製冰，侍應收工前卻要準備三大車冰，每晚就要待酒店客人都休息後，推着冰車潛進酒店，找客用的小型製冰機「偷冰」，一般注滿一輛冰車約10分鐘，記者隨同事去「偷冰」，卻用了近一小時。
肉質有異 長腳蟹變香檳蟹
米奇餐廳主要以自助餐奉客，主打菜式之一就是「長腳蟹」，很多人都慕名而來開懷大嚼。很多客人都以為吃下的就是「阿拉斯加長腳蟹」，其實現在用來招待客人的其實是「香檳蟹腳」，餐牌亦已改掉。
記者當卧底期間，聽到餐廳經理在一次高層閒談中，無奈表示要繼續用「 A貨」，原來半年前已用「香檳蟹腳」來代替了阿拉斯加長腳蟹。餐廳更改餐牌，註明是「香檳蟹腳」。
其實，兩種蟹腳有何分別呢？海洋業聯合總會副主席易國樑指，兩者價錢相若，香檳蟹來自澳洲，一磅僅比阿拉斯加蟹便宜約10元左右。惟相較之下香檳蟹肉質較削，鮮味稍遜，殼亦較多刺，故阿拉斯加蟹在本港較受歡迎，香檳蟹則主要銷往內地。
灌輸文化 入職前先被洗腦
迪士尼要求所有員工入職前都要到「迪士尼大學」上課兩天，內容當然是灌輸公司的文化。同學們戲稱為「洗腦日」，記者亦要去上課，但發覺大家都無心上課，反而各自結識俊男美女，因為難得一大班青年男女聚首一堂。
課堂導師提到 Disney Look（即工作打扮要求）時大家卻即時進入狀態，異常認真。因為大家都關心潮頭潮 look能否保留。不過要求其實相當空泛，如不能「過分染髮」，「頭髮整齊、端莊、容易處理和對稱，不可極端」，鬍子要求長度要「適中，不能有鬚根」，講師解釋「留咗可以繼續留，冇留就唔可以留，想留就放大假留完返工啦！」講師還說：「會有專人巡邏檢查，他們是終極判官。」
最愛投訴 口罩怪客攞着數
「大家要留意一下戴口罩的男人，通常係成家人咁出現，要對佢哋做到101分」。經理某天嚴肅地在例會叮囑大家。迪士尼待客至上，對客人須「有求必應」，但有人卻睇準迪士尼這個文化來「攞着數」。經理指的是以戴口罩的爸爸為首的一家人，以投訴刁鑽聞名整個樂園。
據說，「口罩爸爸」曾投訴在洗手間聞到異味感到不適，要求園方補償餐飲住宿；上月底又投訴園方交通安排不善，結果迪士尼要派專車到欣澳港鐵站接載其一家進園遊玩。此外，亦時常有客人在餐廳用膳後「走單」，有商品部同事則透露精品店內時有商品不翼而飛，原因可想而知，但園方一般採取息事寧人態度，不會報警處理。記者以往都聽到有人在樂園內順手牽羊。
卧虎藏龍 兼職員工揸寶馬
迪士尼樂園的員工爆發逃亡潮，但兼職職位卻有不少人爭住做，理由很簡單，因為兼職時薪高達50元，上班時間比全職短，時間相對彈性，而且兼職員工中亦有人不是為了錢，反而是為了「減壓」，被樂園員工稱為「卧虎藏龍」。最經典的是人稱 MAC姐的侍應，她日間在中環從事金融業，月入近6位數字，有寶馬 X5代步，晚上突然一個大變身，穿上一套侍應服扮演另一角色。
她曾向記者稱，日間的工作精神壓力極大，「唔減吓壓會癲！」。但令記者無言以對的，是她的減壓方式竟是下班後到米奇餐廳當侍應，「至少唔使用腦嘛！而且我對米奇餐廳有特殊感情」。至於當中細節，她只以淡淡的笑容作回應。
採訪手記 盼樂園愛惜員工聆聽訴求
個半月前，我放下筆和相機，換上侍應服，踏進一間以迪士尼主角命名的「米奇餐廳」。始終從沒接觸餐飲工作，還記得那天我不知何去何從，全靠「同事」們再三指點，才勉強完成第一天的工作。
提出意見不被重視
時間飛逝，至離開的一天，我學會了很多當餐廳侍應的技能，更認識了很多富有理想，熱誠工作的年輕人，亦看到了他們如何背着壓力、責備而辛勤工作。
無論上下班，同事們吐的苦水再多，我感覺他們都還是真正愛着迪士尼、愛着這間餐廳、愛這裏的文化，不然沒有人會甘願賺取比市面少一兩成的薪水默默工作。而事實上每次看到客人滿足地離去，員工都開心得笑了出來。
只是，員工們更是愛之深責之切，不能對管理上的種種不合理情況視若無睹。更甚者，每每提出意見後都石沉大海，自覺不被重視。他們當中有人雖然無奈離開，也總帶不捨之情。留下來的員工，他們的訴求很簡單，就是迪士尼樂園也應該愛護她的員工，認真聆聽他們的訴求，給予他們更合理的待遇。
----------------------------------------------------------------------------------------------
香港迪士尼開業七年.. 我從未見過蘋果做過一篇對HKDL 咁真實咁善意咁有深度ge 專題報導~ 一邊睇一邊被感動同時痛心...到睇到記者後記時我真係睇到喊左出黎!! 呢篇可以證明~ 小弟係唔會盲目地偏幫迪士尼~
香港迪士尼樂園作為一個夢想奇妙國度... 但魔法力量不斷咁減弱.... 我對於以上咁大篇報導有兩點唔認同~ 1. 迪士尼文化喺香港唔係唔work~ 2. 迪士尼教授自己一套待客之道並唔係洗腦~
迪士尼文化本身喺美國係好成功~ 就算去到東京同巴黎都一樣~ 但點解黎到香港會變質?其實係因為香港人短視... 回想以前Bill Bill 做CEO 日子.. HKDL 對CM 所提供ge 福利比依家好好多~ 雖然淡季仍然人手緊促致使休息時間唔夠... 同埋員工反映意見機制都稍為落後於外國...
一個美國CEO run Disneyland ge 問題就係平衡唔到員工福利開支同埋樂園營運收入平衡~ 最終不敵外間一班短視香港市民同議員反對... 所以換左一個香港人做CEO~ 換左一個香港人當政好自然就係用返香港式ge 管理政策ga la~ 而你班人同政府要求迪士尼賺錢ma~ 當然就係削減開支... 幾千個員工加埋每年福利開支何其龐大? 造成今日呢個結果... 並唔係冇原因...
香港迪士尼都有個工會... 但呢個工會似乎提供唔到應有ge 援助.. 勞資雙方勢力懸殊下令到員工意見去唔到管理層... 至於樂園每一條team 都有代表可以同管理層反應意見... 但當中又有幾多人係敢言呢...?
巴黎迪士尼每年最起碼都會有一次工潮~ 而大家都見到DLP 開支同收入之間ge 不平衡結果導演長年虧蝕~
今年眼見有好多Fans 小朋友長大~ 嘗試入HKDL 做.. 小弟都有同部分朋友仔講... 香港迪士尼係Part Time 天下~ 做Part Time 非常開心~ 但如果你雄心想做管理層改變現狀又或者WDI~ 做frontline 並唔係一條容易成功ge 途徑~ 過去七年都有無數有熱誠ge 人嘗試過~ 但你對公司有passion 係唔及你對工作崗位有passion 咁重要~ 你又感唔感受得到Marketing 係由一班對迪士尼有強烈passion ge 人去做?? 各位都係俾心機讀書~
睇住呢篇文章... 45日就可以盡見人生百態~ 以下逐點分析~
1. 每年有兩個離職高峰期.. 一係新年出左bonus後... (基本上每一份工都有呢個情況~) 二係Summer 天氣轉熱前.. 再加上暑假人流大增~ 所以每年Summer 都會大搞招聘會..
2. 2005 年開幕時入職薪酬到2011年薪酬竟然係一樣!! 六年黎都冇跟到通貨膨脹而調整! 個人覺得呢篇並唔係與標題不相乎~ 最低工資令到外面市區餐飲業薪酬同HKDL 距離收窄左~ 加上大嶼山地理問題~ 扣埋車費同時間可能不及喺屋企番附近搵一份酒樓工咁吸引~ 求職人數因而大跌... (過去呢個月.. HKDL 對CM 現有薪酬作出調整~ 特此一提)
3. 每到颱風季節都會有留宿情況~ 作用就係確保留喺resort 內ge guest 仍然得到應有ge 服務~ 以前酒店唔full... 都可以上酒店房訓~ 但依家酒店爆滿晒連房都唔夠.. 又點可能俾到CM 上房呢??
4. 至於d 野壞... 其實成個resort 有好多野都係壞... 睇下你睇唔睇到.. 又黎提Orbitron 個星球... 錢ge問題.. 但相信作為一個客能夠見到ge 壞野.. 只係冰山一角...
5. 迪士尼大學並唔係洗腦.. 佢都只係教呢個公司ge 歷史同埋自己一套待客之道~ 因為佢每一個工驟都要附合幾個條件~ 一黎係為左減低工傷同意外~ 二黎係想表現到professional 出黎~ 所以呢一點我係唔同意記者所指係洗腦... 而係有必要!
6. 飯鐘呢d.. 就唔加好過加... 因為最終只會益左Part Time... Part Time 喺迪士尼樂園已經可以話係大晒~ 如果計埋飯鐘錢會影響到年尾花紅~ 班Full Time 就更不滿~
好似冇咩漏~ 係呢度完結~ 記得就再update~ 以上專題報導並非個別個案~ 而係全個resort 前線cast member 同樣受緊呢種對待~
後記...
由於員工敢怒不敢言~ 工會亦起唔到作用.. 有夢想的人只能相繼離去...(請注意: 人同海豚係兩種生物~ 人係確實有自由意願選擇轉工!! 不能相提並論~) 蘋果呢一篇報導對樂園黎講反而係好事~ 渡假區主要係提供服務.. 提供服務者本身都唔快樂... 又如何令到客人快樂?? 我明白有人會覺得食得鹹魚要抵得渴~ 每間公司有自己制度~ 覺得頂唔順咪走lor~ 但我地講緊ge 係迪士尼樂園.. 個人認為magic 同happiness 係相輔相成不可分割~ 有快樂先可以創造出魔法.. 而魔法能夠產生更多快樂~ CM 同Guest 之間就係靠呢個互動去維持關係~
最終惡性循環下回頭客越來越少.. 對HKDL 並唔係好事... 透過呢篇報導.. 希望園方會盡快改善現有機制~!! 我唔介意之後擴建同Seasonal Event 因為budget 作出調整而受影響~ 我只想入park ge 時候見到CM 們都對呢份工同自己工作崗位感到自豪~
HKDL 好幸運有一班打從心底義無反顧支持佢ge 員工同Fans~ 包括呢位記者~ 雖然感覺好似係揭緊HKDL 瘡疤~ 但只要你細心睇當中文字... 你會發現其實成篇報導係源於愛呢個地方... 希望金生同佢班管理團隊會識得珍惜..
上次海洋公園發言人答覆先係致命傷~ 今次睇睇香港迪士尼會點答~
====================================================
今日蘋報對於香港迪士尼呢篇報導又有後續篇~ 係班CM 報料話有不平等待遇~ 但其實不平等呢d... 間間公司都有~ 所以我覺得今日呢篇內容並唔重要~
尋日見到有網友留言話果篇報導個記者係嘩眾取寵又話佢有偏見咁~ 咁呢個世界每一個人都會有自己ge 觀點角度~ 而蘋果報導手法一向都係會加入個人感想~ 但重申一次呢一篇報導... 撇除某d 個人感覺字眼~ 入面內容有大部分都係真實~ 而小弟覺得呢位卧底... 以一個蘋報記者黎講~ 佢ge 手法已經非常正面~! 仍然係我覺得呢七年黎蘋報寫迪士尼寫得最好最深入ge 一篇專題報導~ 嘩眾取寵... 係蘋報一向作風~ 所以有少部分稍微放大都係能夠預料~
由於Office 係五天工作~ 所以尋日同今日都未見到行政同管理部門造成咩迴響~ 但Operation 都已經不停談論呢件事~ CM 們主要係分成兩派~ 一個派別係好激氣點解蘋果要血淋淋地爆公司大獲~ 另一個派別係覺得公司抵死.. 你都有今日la~~ 但兩個派別都有一個共通點~ 就係絕大部分人都認為報導內容並非虛構~ 大家一直都知道事實~ 只不過唔出聲~
聽日.... 留意香港迪士尼答覆!
沒有留言:
發佈留言