This is Mr. B: 與彼思動畫製作人

好高興又可以參加Disney PR 搞嘅活動。今次我地一眾Blogger更加有機會同Pixar嘅攝影構圖指導林敬雄先生(Patrick Lin)會面，了解黎緊9號上映嘅《勇敢傳說之幻險森林》幕後製作過程。

今次活動大家都齊集喺The Walt Disney Company(Asia Pacific) Limited辦公室嘅休息室裡面，一路享受食物一路等侍活動開始，可能因為唔似上次有Media在場嘅關係，大家嘅氣氛都比較輕鬆。Patrick Lin更加配合今次活動主題，著上Brave嘅T-Shirt，同埋蘇格蘭裙出席今次活動。在場所見，各位Blogger都好認真咁期待住活動開始。Patrick仲好用心咁準備咗個PowerPoint介紹佢地喺Pixar入面嘅工作。

喺上次嘅BRAVE Fans/Media Experience，Patrick透過電話都同我哋分享咗唔少野(可以click入呢度睇返)，今次就等我主要介紹下Pixar喺製作每套電影嘅時候嘅主要流程喇。礙於在場Patrick俾我地睇嘅圖片及影片都係有版權，唔可以影相嘅關係，所以以下一部分嘅圖片只好以Toy Story 3嘅一啲網上圖片黎代替。

1. Storyboard (分鏡式劇本)
首先一套電影最先嘅概念都係來自Storyboard，係由唔同嘅分鏡概念圖組成。分鏡劇本其實已經可以大約講到成個故事係點，就例如以下呢個例子咁。

Patrick表示，Storyboard往往都係成套戲用得最多時間嘅地方，因為除咗要因應故事發展而不斷改劇本之外，仲要係配合返故事最基本嘅原素：佢背後想帶出嘅意念。所以呢個步驟一啲都唔容易！

以上呢一幅就係攬攬熊勞蘇帶領反斗奇兵主角們參觀Sunnyside一幕嘅storyboard。
2. Camera and Staging (攝影及舞台)
上一次都提到，所有分鏡都應該要盡量配合真實環境，咁先可以令到成套戲俾到人一種代入感。Patrick主要係負責攝影，所以佢向我哋詳細地介紹咗由佢負責《勇》嘅比武招親一幕，等我哋了解到唔同分鏡係點樣配合。

而Staging方面，呢個階段最主要嘅係舞台設計同埋就位。由於每次故事都喺唔同地方發生，所以佢哋一定要事先整好個故事嘅舞台。而就位，就好似平時拍戲或者做話劇排練果陣咁樣就位。呢個階段嘅所有野包括角色、場景郁動等，都係暫時用住一個完全唔detail，冇表情冇動作嘅3D角色去排戲就位，等佢哋可以根據呢個基本嘅排位及動作，到下一步果時能夠就岩時間郁動。由於暫時只係初步，Merida個3D角色甚至係冇著裙冇頭髮嘅添。

上面呢個就係Toy Story 3 裡面Sunnyside Daycare嘅場景，而《勇》則是位於蘇格蘭嘅一個虛擬場景。
3. Animation (動畫)
呢個就係成套戲最繁複嘅部分，要靠動畫師根據上一個步驟定好嘅排位，逐個逐個鏡頭去執所有角色嘅動作。由只係好生硬根據指定路線郁嘅公仔變成好似真嘅一樣咁樣活動，呢個部分的確需要好多時間。其他公司有啲戲可能會用上某個特別設計嘅程式去令後面嘅配角或士兵們自動打鬥，但Patrick話佢哋每個角色，甚至係士兵打交嘅場面都係靠人手逐個排位。可見Pixar嘅認真程度係幾咁高。

當角色排好位，做好動作之後，大約就係好似上圖咁。大部分角色仲未有毛髮同質感，要下一步先會做。
4. Simulation (模擬)
直至上一步，其實所有角色仍未著好衫同生好頭髮，係因為衫同毛髮呢啲細節會因為角色動作而有所不同，所以要到而家先可以整。如果事先整咗，可能會出現底衫穿咗上面衫上面，或者頭髮入咗落隻手之類嘅錯誤。所以呢一個步驟都唔可以睇小。就好似Merida嘅頭髮，今次對Pixar嘅人員黎講都幾大挑戰，因為佢啲曲髮都幾難模擬。仲有今次啲角色比起之前嘅著得更多層衫，最多有成八層，所以都比起以前複雜。

而家就已經將毛髮同質感模擬好，但由於欠缺粒光，仍然比較生硬。
5. Lighting (燈光)
當所有野整好曬之後，就要到燈光嘅部分喇。燈光可以令到個場景更加真實，係成套戲畫龍點睛嘅一部分。經過差唔多20年嘅發展，由Toy Story 1果時燈光仍然比較生硬，到咗而家《勇》嘅燈光效果，顯然係進步不少。

加上燈光之後就會變成上圖咁，亦都已經係完成品。
在場Fans們都問咗好多問題，當中比較深刻嘅係原來Pixar對顏色並唔只係一般人咁執著。點解Merida要係紅色曲髮？原因係可以更加突然到佢火爆而且勇於抗拒命運安排嘅性格。另外我都有問到，角色係點樣夾返配音員對白嘅口型呢？原來佢哋製作動畫時雖然配音幾乎係同時進行，但原來口型配合其實唔係想像中咁重要，反而身體語言先更加能夠突出角色想表達嘅意思。