This is Mr. B

2017年6月4日星期日

擴建後與TGM人流

如果Moana 個演出係要將人流引入Adventureland, 又應如何進一步將人流引入TGM?

Arendelle 建成後將打通小小世界 (甚至係故事劇場) 至灰熊山谷之間嘅通道. 假若樂園鐵路可以喺迷離莊園加多個站, 遊客亦能夠直達呢個偏遠位置.

但樂園嘅夜間演出會將遊客引返出去小鎮大街, 令TGM 變得更冷清.

現階段未知擴建後仲會唔會有煙花, 但長遠嚟講只要樂園繼續發展, 樂園嘅開放時間將會進一步延長, 夜間城堡匯演並唔會係Grand Finale. 終有一日園方需要考慮將人流從大街拉返入去偏遠位置. 到呢個時候園區內嘅河 / 湖就變得好重要.

例如... Rivers of Adventure 有冇機會學Rivers of America 咁整一個類似Fantasmic 嘅演出?

第一次見到Arendelle 概念圖個湖已經覺得好有可疑, 用咁大個位整個湖出嚟並唔似香港迪士尼嘅作風. 到底呢個安排又會唔會係為將來加入演出作準備?

Moana's Village Festival 與探險世界人流

Adventureland 嘅工程位置本身係一條河, 要起個台同帳蓬之前, 應該要首先填返條河吧?

根據發佈概念圖估計, 個台咁大應該會係面向碧林餐廳 (如果向樹屋嘅話黃昏會曬正, 個帳蓬如同虛設).

因為呢個位置設於三條路之間, 台嘅方向會影響遊客流向. 面向碧林即係吸引更多人途經城堡至灰熊山谷嘅一段路. 但其實原野劇場正正有同樣作用.

未來煙花發射區將建Arendelle, 至起碼工程期間幻想世界往來反斗奇兵大本營嘅通道唔會因煙花而封閉. 而呢段路往往係遊客進出TGM 嘅首選. Arendelle 建成後遊客更可由故事劇場一直經下路行到灰熊山谷. 將來TGM 嘅人流問題應該可以改善.

問題來了, 森林河流之旅其實係唔係更需要靠呢個舞台演出引入人流? 如果要達到呢個目的, 舞台需面向瀑布. 但工程位置係一個長形, 舞台面向瀑布其實並唔能夠起到概念圖咁大....

都係純吹水, 好快就知會點起. 2018年 - Moana's Village Festival 即將同大家見面.

2017年5月21日星期日

彗星餐廳回復原貌

賣香港小食都幫唔到?

彗星餐廳轉型失敗?? 回復售賣麵飯... 不過都係唔開.

其實呢個位有冇可能放返出嚟? 園區靠火箭餐廳係咪已經足夠? 搬Jedi Training 過嚟呢邊咪唔駛少咗個show. Star Wars 系列似乎仲有排做.

巴斯光年星際歷險即將進入最後倒數

作為Fans, 大家應該好清楚香港迪士尼所有事往往係等到最後先公佈, 所以其實最好喺園方公佈巴斯光年幾時關閉之前就入去玩, 未公佈唔代表仲有大把時間, 又或者公佈之後可能你根本唔得閒入園.

既然去年已知巴斯光年會改成MARVEL 主題, 並計劃於2018 年啟用, 而財務安排亦已有定案. 咁呢個工程真係已成事實, 過一日少一日, 把握最後機會吧!

2017年5月17日星期三

Mystic Manor 四周年

Mystic Point 四歲大日子, 分享呢一篇. 值得自豪.

Imagineering Fans Call This Disney's Best Ride in Decades
https://goo.gl/DpgqQY

真係好長嘅一篇文章, 由Walt Disney 設計Haunted Mansion, Michael Eisner 嘅黑暗時代, 香港迪士尼開幕同過去嘅發展 (有提及Pirate Coast 同Glacier Bay), 上海迪士尼嘅出現以至驅使香港迪士尼今次重整樂園計劃.

外國Fans 深信Mystic Manor 會係佢哋嚟香港迪士尼嘅最大目的, 但問題係香港並唔係佢哋會貿貿然到訪嘅地方, 唔會因為一個Mystic Manor 而嚟.

所以就出現今次樂園重整計劃. 所有項目完成後, HKDL 將有四個喺獨當一面嘅園區 (Marvel, Arendelle, Grizzly, Mystic), 獨一無二嘅Castle, 更重要係有Mystic Manor.

香港迪士尼真係要好好繼續推廣呢個能夠吸引外國Fans 嚟嘅重要遊樂設施.

2017年5月14日星期日

Pirates of the Caribbean巴黎宣傳

Johnny Depp 喺美國迪士尼以Jack Sparrow 造型驚喜現身Pirates of the Caribbean 遊樂設施; 電影嘅全球首映禮喺上海迪士尼舉行; 今日一眾演員嚟到巴黎迪士尼, 仲要好齊人....

我唔羨慕, 只感到失望. 香港迪士尼再次被總公司無視同遺棄. 但自己唔爭氣, 又怪得邊個?

Iron Man與FastPass+

有朋友搵返呢篇傳聞出嚟, 其實以前都有分享過, 今晚再分享一次.

雖然傳聞係指未得到證實嘅消息, 但配合返實際情況睇, 又未必係純屬虛構.

或者大家對Iron Man 都有一個疑問, 點解佢設有FastPass 入口, 但係設施範圍內冇預留空間起FastPass機, 而且要將已經收起咗嘅巴斯光年機械人造型FastPass 機拎返出嚟為Iron Man 提供FastPass, 似乎將蛛絲馬跡夾埋後可以推斷, 園方或曾計劃喺Iron Man 應用FastPass+.

有興趣嘅朋友可以睇下呢篇: https://goo.gl/A3Kbbs

再睇返Iron Man 工程進入尾聲時香港迪士尼嘅入場人數同財務表現, 其實唔難想像兩者嘅關係.

但現階段嘅香港迪士尼係咪真係可以容納到FastPass+? 或者依家個做法已經係最好. 只希望園方會考慮埋巴斯換成Marvel 主題後嘅人流預計.

至於有人話巴斯位置拎Iron Man 飛造成混亂, 其實借用其他設施FastPass 機派飛呢個做法嘅Disney Park, 香港唔係第一個.

2017年5月13日星期六

睡公主城堡

睡公主城堡亦即將同大家告別. 但你知道呢座被取笑又矮又細嘅城堡, 原來背後都隱藏住幻想工程部對香港迪士尼嘅眷顧同愛護嗎?

香港迪士尼嘅籌備同興建, 正值Walt Disney Company 嘅黑暗時代, 當時嘅CEO 係Michael Eisner. 同HKDL 同期嘅樂園仲包括California Adventure Park 同巴黎嘅Walt Disney Studios. 呢三個樂園嘅共通點都係慳錢同低成本.

的確, 當時喺Michael Eisner 嘅管理下都係慳錢為首. 佢構思香港迪士尼嘅時候, 原本想將Main Street 同Castle 以Studios 嘅形式呈現, 即係一塊有建築物外貌嘅平板再喺後面加有外露嘅支撐架... 簡單嚟講, 即係大三巴咁.

幻想工程部極力反對呢個構思, 堅持小鎮大街同城堡都要係真實建築物. 最後就成為我哋依家見到嘅建成品.

有興趣嘅朋友可睇呢篇: https://goo.gl/eyPweL

香港迪士尼以全球最細同大量複製設施開幕, 之後Michael Eisner 離開Walt Disney Company, 往後HKDL 嘅擴建項目逐步重回一個Disney Park 應有嘅軌道. Pirates Coast 呢個project 甚至係要比上海迪士尼建成嘅海盜園區更吸引, 只可惜有好多原因令呢個計劃落空.

跟住California Adventure 獲得大筆投資而得以重生, 而香港迪士尼都有幾次擴建計劃, 直至今次嘅重整樂園計劃, WDI 決意要幫我哋座城堡一雪前恥.

WDI 一直都好錫香港迪士尼.

2015年2月19日星期四

香港迪士尼衛星圖

除左上海迪士尼工地有新圖外, Google Earth 亦更新左香港迪士尼上空衛星圖 (Google Map 未update). 依新圖所見:
1) 兩間鬼屋仍然未拆.
2) 聖誕樹仍然屹立於Town Square.

可以得知呢張圖係2014年拍攝

2015年2月13日星期五

上海迪士尼　十二朋友園

上海迪士尼一個獨有嘅主題 - 十二朋友園, 以中國十二生肖配合Disney Character 嘅園林. 園林內會有12幅壁畫, 分別以各迪土尼故事人物表達中國12生肖形象. 2013年公佈時已知「鼠」會係《五星級大鼠》內嘅老鼠廚神 Rémy (味王).

較早前微訊出現呢個園區十二位Disney Character 嘅線條. 睇下大家認唔認得晒呢十二位朋友

2015年2月9日星期一

[經濟日報] 香港迪士尼樂園公布2013/14財政年度業務收入、盈利及入場人次均創新高。

樂園業務收入達54.46億元，按年12%，並連續第3年錄得純利，全年純利按年大增36%（即8800萬元）至達3.32億元。

樂園入場人次750萬，升1.35%，累計入場人次突破5000萬；但酒店入住率則下跌1個百分點至93%。48%樂園遊客來自內地，本地遊客佔32%，國際遊客佔20%。

入園人均消費按年升11%，餐飲商品大賣，主要受惠於冰雪奇緣，每周賣出530件公主裙、3300個公仔，打破歷年公主系列紀錄。

Spike the Bee

自從農曆新年活動一年比一年少野玩之後, 香港迪士尼基本上已經可以話冇左呢個Event. 踏入2015年, 就得返商品同Mickey and Friends 嘅新年裝扮.

今年小鎮大街嘅主題裝飾同往年有明顯分別. 香港迪士尼都好似巴黎迪士尼同Epcot 咁出現春季花草主題Decoration, 唔知會唔會係考慮未來加入Spring Event 嘅前奏呢? 其實個人覺得呢類裝飾可以喺Star Guest 期間繼續擺放, 襯返春天嘅氣氛, 況且Star Guest 真係唔能夠作為橫跨幾個月嘅唯一活動.....

HKDL 第一次非正式Spring Festival, 大街燈柱出現全新設計裝飾, 如果今次係CNY 同Spring Event 嘅測試過渡期, 其實個人認為呢個設計並唔差, 畢竟要搵個同時合乎兩個主題嘅風格. 有少少中式都在所難免.

2015年2月8日星期日

香港迪士尼的十周年

2015年香港迪士尼就會踏入營運第十年, 而已知道喺十周年呢個財政年度會發生嘅事, 就係Iron Man 會喺2016年開幕, 呢個計畫係Tomorrowland 自2006年開左馳車天地, 史迪仔同UFO Zone 之後嘅首個擴建項目, 而Iron Man 呢個模擬飛行嘅設施, 主題上都係迪士尼購下Marvel 版權後首個以Iron Man 作為主題嘅樂園設施, 所以都可以話係全球矚目, 再加上片段入面有極本地化嘅元素 (香港維港景), 可以肯定呢個設施會係永久地屬於香港嘅獨有版本.

2015年1月10日星期六

香港迪士尼推出「食買玩」優惠

2015年係十周年嘅大日子, 雖然唔知道今次呢個十周年活動會唔會好似五周年時咁會夾埋新Attraction 先開始. (當年係夾2011年開幕嘅Toy Story Land, 而Iron Man 設施預計會喺2016年第一季開幕). 但係上海迪士尼都即將要開幕, 而亞洲區內仲有好多個大型Theme Park 現正興建, 香港迪士尼有必要進一步加快擴建. 擴建除左需要資金外仲要有兩大股東嘅支持, 而獲得支持嘅關鍵係要有令人信任嘅財務狀態同足夠入場人數. 所以HKDL Marketing 已經開拓緊東南亞市場, 亦同時以優惠吸引香港市民.