Big Finale Chapter 1 - Universal Studios Japan

2013年仲有兩日就完結, 今年小弟唔知點解突然搭咁多次飛機, 到訪幾個大型Theme Park, 將目光放遠少少, 呢個世界唔只得兩個主題公園, 有好多人都將香港兩個park 相比, 但係只要放目光放大至整個大環境, 就會知道香港兩個park 並唔係競爭對手. 

今年上半年小弟到訪過北美洲西岸, 踏出夢想成真嘅第一步, Disneyland Resort 係我最喜受嘅主題樂園, 所以放左好多時間慢慢遊覽. 相比之下今次Big Finale 雖然會為大家介紹幾個park, 但仔細介紹程度預計應該唔及Disneyland Resort. 先向大家講明呢一點, 希望唔好介意.

向世界走出嘅第一步, 黎到日本大阪環球影城. 

預告左幾個月, 大家都或者估到小弟Big Finale 呢個Dream 係想過一個白色聖誕... 黎到大阪, 呢個夢想隨即實現! 從朋友口中得知大阪落雪並唔常見, 尤其係12月! 所以呢一朝見到一場短暫嘅雪, 非常感動! 旅程第一日已經夢想成真! 希望呢份感動可以一直維持一段長時間! 

今次黎USJ 有一個好重要嘅目的, 就係要親眼睇一次佢地個Night Parade, 呢個Magical Starlight Parade Lighting Designer - Paulie Jenkins 都會為香港迪士尼樂園明年新夜間巡遊擔任Lighting Designer 一職, 所以想藉住USJ 呢個巡遊預計一下將來Paint the Night Parade 會大約係點樣.

上年都喺YouTube 睇過佢地個聖誕3D Mapping show, 係一個可以阻止小弟飛片嘅日本Theme Park Performance... 亦都納入今次旅程嘅其中一項必要完成嘅任務. 

有聞日本人對於Theme Park 呢樣野非常瘋狂... 可以風雨不改同冒住寒冷天氣坐喺度幾個鐘等開Show... 所以我都一早預左錢會買pass... 希望可以用錢買些少時間... 

Booklet 7.. 就係用錢買七張Fast Pass. 其實要絕對讚賞Universal Studios Hollywood PR, 因為上次去USH 個感覺太好啦.. 全部都係直接行到上車位. 所以今次都唔想太浪費時間...

假如你冇睇到上次Universal Studios Hollywood 之旅嘅Trip Report, 其實呢個Theme Park 係會售賣Fast Pass, 由特快通道進入. 就好似Disneyland 拎FP 一樣, 不過呢邊只可以俾錢買Booklet, 有4個Ride 同7個Ride 兩種booklet 俾你揀.

聖誕裝飾... 呢邊每一個園區嘅BGM 都會以佢地特有嘅風格彈奏出聖誕歌曲旋律. 

第一個要玩嘅設施 - Spider Man. 呢個係改左做HD 後嘅版本. 由於Ride Nature 同Transformers 好似, 所以都有好多人比較. 而個人認為Transformers 係較為缺乏special effect. 只係一架會郁嘅vehicle 睇3D 電影... 還記得我同位當地朋友玩完之後都有同一個感覺, 就係唔知個ride 講緊咩故事..

但係Spider Man 係集合左好多個唔同嘅特別效果, 每一個scene 都有佢嘅獨特之處. 而且亦冇Transformers 咁chok. 所以如果要作一個勝負比較嘅話... Spider Man 勝!

行入New York 區域... 再次驚嘆Universal Studios 嘅強勁. detail 程度絕不比Disneyland 遜色! 我好想每一隻櫥窗都慢慢影.. 但呢度實在太大! 冇可能一下子影得晒. 

呀.. 呢個區域仲有一個Terminator 2 嘅表演, 唔記得影相. 配合真人喺前台演出嘅3D theater. 如果我識聽日文嘅話應該會睇得較開心.. 真人演出配合電影情節係做得幾出色. 但無奈呢齣電影已經有一段歷史.

好鍾意呢個area... 當年喺USS 都影左好多相...

 

San Francisco. Back to the Future, 2013年係「Future」年. 都要入去玩下. Ride System 同Simpsons 一樣, 都係勁chok.

留意遠處... 聽唔聽到Harry Potter 首主題曲? USJ Harry Potter 主題區域2014年正式開放, 不過好快都可以去Orlando 原版朝聖!

Jurassic Park, 其實呢個Ride 小弟分別喺USS 同USH 都已經玩過, 感覺上係短過Hollywood 版本. 

雖然冇Mummy Ride 冇得再施之前教大家個方法, 但係好貼心嘅事係呢邊Locker 係有得退錢!!

路過見到... 流左少少喎... 新加坡果隻做得好真...

Waterworld 呢個表演呢... 今次我都係skip 左! 因為日本冬天五點就會天黑. 仲有好多野要做....

行到黎Amity Village, 呢度嘅故事設定係一個寧靜嘅小漁港, 亦都順便用埋Studios 中間個大湖做背景. 雖然只係一條街道仔, 但係我又係覺得呢度個theme 好強, 因為Jaws 呢個ride 已經變成USJ 獨有, Florida 已經拆左呢個區域做Harry Potter, 而Hollywood 只係Tram Tour 嘅其中一個場景, 就變成得返大阪環球影城先搵到. 影左好多相, 但係恕小弟唔能夠全部都post 出黎. 

而Jaws 呢個ride, 令到我感到... HKDL CM 個投入態度真係同其他Theme Park 差好遠... 其實唔只係日本theme park, 美國果邊就算係Jungle Cruise.. Cast Member 都係好投入同落力演出. 早一排上外國forum 見到有外國網友黎HKDL 玩JRC 竟然留下一個劣評... 覺得真係好可惜... 如果將原因歸咎於賓客唔投入或不屑CM 投入演出, 咁其實係咪即係代表JRC 可以因為「文化差異」呢個理由而失去存在嘅必要? 

嗯... Jaws 呢個ride 場景真係做得好靚, 雖然小弟聽唔明日文, 但係都估到大約劇情. 同埋呢個ride 係會濕身, 集中喺船左邊. 想乾身可以考慮一下坐右邊. 

較為新嘅小朋友區域, Universal Wonderland. 以USJ 三個紅星作為主角. 

Snoopy 主要係一個轉轉設施, 不過都有食肆同餐廳. 

仲有個人覺得好恐怖的粉紅色王國... Hello Kitty... 其實出面大街都有一個超級粉紅Pink Panther Cafe... 不過影左相出黎個效果係好過現場睇... 配合藍天好colorful

雖然係好得人驚, 但係Hello Kitty 都算係日本代表.

Sesame Street. 不過係走Elmo's World 入面嘅卡通風格. 算係三個主題最多野玩嘅地方. 

Elmo 喺USJ 真係主角黎. 睇下Night Parade 做Logo Drive 就知.



而旁邊.. 音樂又再響起啦.

返到Hollywood, 呢邊有好多個ride, 兩座過山車. 有stage show, 仲有兩個4D show

呢個真係要講一講. 一個場地有兩個Show, 朝早係Sesame Street 而下晝就係Shrek. 喺等侯區等緊睇Sesame Street 時對於個preshow room 感到好有趣, 因為玩過Shrek 所以知道佢個Pre-Show room 有好重要嘅作用, 但眼前景象完全唔似一個刑具室, 唔通會cut 走pre-show? 下晝真係走左去睇多次Shrek. 一入到pre-show room... 間房真係變左身! 好神奇又好慳位嘅安排. 

兩個show 比較, 我仍然係覺得Shrek 吸引d. Sesame Street 玩唔到咩特別效果, 而同樣係布公仔, Disney Muppet Vision 4D 做得出色好多. 

食個飯就要同班日本人爭位... 行左一圈之後被Amity Village,呢個軟殼蟹包吸引, 比我想像中更美味! 同時亦發現到USJ 入面好忠於故事場景, 影城入面幾乎搵唔到有日式食品! 反觀香港迪士尼迎合大陸人口味, 樂園內 (唔計晶荷軒) 有不少於五間食肆提供中式餐飲...

等... 天使のくれた奇跡 II ～The Song of An Angel～, 日本人真係太強... 已經係買左Pass. 早45分鐘去到都要坐後側.. 就係咁.. 小弟強忍住寒冷嘅天氣坐左喺度45分鐘... 不過我覺得呢個show 坐得太前反而睇唔晒成個舞台同3D Mapping 效果.. 

故事好簡單, 但表演係唱LIVE 的, 而且畫面好豐富, 唯獨因為當晚受強風影響令到呢個表演以一個略為修改嘅形式呈現. 其實都好值得睇

片段

http://www.youtube.com/watch?v=jydDRWqTOa0

 距離Night Parade 仲有一個鐘頭時間, 可以玩多樣野先去等.... Backdraft, 係一個介紹Hollywood 電影特技同拍攝手法嘅設施. 而USJ 呢個版本就以火災場景為主題. 去得呢類大型Theme Park 玩, 都會信任佢地係安全. 所以可以玩／睇得好投入.

 好啦! 要出去等睇Magical Starlight Parade 啦!

冬天玩日本theme park 真係一件好痛苦嘅事, 尤其係小弟到訪USJ 呢日, 朝早落得雪晚上氣溫都唔會暖得去邊... 仲要因為想霸個靚位而提早坐喺Parade Route 等待. 但相比起睇Xmas show 等45分鐘, 今次只係等左20分鐘. 已經算唔錯! 

親身欣賞Magical Starlight Parade 係今次黎USJ 嘅主要目的. 呢個巡遊喺花車數量不比迪士尼少, 而且亦都用左projection 播放動畫. 唔知Paint the Night Parade 會唔會有花車播放動畫片段呢?

Logo Drive 係Elmo, 後面仲有Snoopy 同Hello Kitty. 個人覺得Elmo 係整個巡遊入面最靚嘅一架車. 尤其係佢個鼻同雙眼. 比較返旁邊遊客比例單單呢個位都有半個人咁大. 但呢個面積嘅大燈箱都可以保持燈光分佈平均同柔和. 

之後就係三組以童話故事作為主題嘅花車群. 老實講. Character 唔係你同我都熟悉嘅造型呢一下可能會令到你覺得似山寨品. 但Disney 並非呢幾個童話故事嘅原作者, 只係擁有自己設計嘅Character 造型版權姐.

撇開樣貌同版權問題, USJ 呢個Night Parade 嘗試走出花車上燈光一定要係呈現出一點點嘅呢個既定規則. 最明顯係用左霓紅燈同光纖技術.

亦用上不同形狀嘅燈罩擺脫圓形嘅燈光.

上面係Alice in Wonderland, 下面係Aladdin 同Cinderella. 小弟唔係每架車都放上黎.

我覺得唯一做得唔好嘅係呢批花車綁燈嘅手工並唔太整潔. 睇得出佢有好多位都係原本想拉一條直線, 但出左黎係鬆左. 可能只係每日operation 同maintenance 時令到D 線鬆左呱. 我相信黎到香港迪士尼就算呢位Lighting Designer 隻眼開隻眼閉, 都過唔到Steve Davison 呢關.

仲有一個呢個巡遊冇出現但我深信Disneyland Night Parade 一定會有嘅效果, 就係白色閃燈. 一加左呢d 白色閃燈, 整個效果就會變得非常夢幻.

文字同相片真係唔能夠完全解釋. 不妨睇睇片段, 有HD 版.

https://www.youtube.com/watch?v=L56Oaktf4Oo

Magical Starlight Parade 係一個集合多個燈光技術嘅夜間巡遊, 個人覺得Animazement / Paint the Night Parade 都會有好出色嘅燈光效果. 只不過.... 我唔相信香港迪士尼會一搞就搞個大型過東京迪士尼嘅Night Parade 姐... 完全唔會信金生亂吹... 所以我地都只需要預期出黎效果會係靚就可以...