Big Finale Chapter 2 - Tokyo Disneyland

真係唔好意思, 之前喺Facebook page 都講過去完旅行返黎工作會比較忙, 所以update 完chapter one 之後都拖左一段時間, 而且我覺得之後都係唔可能好似DLR 咁打如此大堆頭文章, 喺度同大家講聲對唔住先. 另一個對唔住就係大家都知道小弟一直都唔太理會東京迪士尼, 所以如果有咩講錯左行錯左玩錯左, 請唔好見怪.

離開大阪, 黎到東京. 其實行程上喺東京迪士尼樂園渡假區唔係逗留得太耐時間, 一日去一個Park.. 再加上聖誕呢d Peak season, 冇可能一日內玩得晒...




雖然明知呢兩日都會係高峰期, 排隊比較耐, 但好開心都玩到唔少嘢. 對上一次黎東京迪士尼嘅時候都仲未去過香港迪士尼, 可想而知相隔左一段頗長嘅時間. 所以感受比以前細個果時更深.

第一日: 迪士尼樂園.



入園就見到好多30週年慶典嘅裝飾, 一如以往地都係好華麗好吸引. 有好多人排隊影相, 冇錯. 係排隊影裝飾. 喺呢度真係要讚一讚日本人嘅秩序, 佢哋唔單止影迪士尼朋友時會排隊, 仲會為咗企喺最正面影裝飾而排隊逐個埋去影. 相反香港就比較自由, 先到先得, 禮讓少少都影唔到, 不得不承認情況係比較混亂. 可能真係因為呢個原因所以我地呢邊Character 都唔能夠隨意走動...



第一時間去拎Monster Inc.FastPass, 雖然已經開咗3年, 但等候時間都長, 9點幾已經拎緊4點嘅Fastpass... 遲D 再返黎玩....



Pirates of the Caribbean, 之前喺美國已經玩過, 但原來喺唔同地方玩真係會有不同感受. Jack Sparrow 出現既地方幾搞笑. 如果當年Pirate Coast 真係起得成, 個版本會配合Splash Mountain / 滑浪飛船式嘅向下衝, 一定會更加刺激... 好可惜冇左.. 唔知上海會唔會執左二攤呢?




跟住去咗排巨雷山, 排隊時間大約1小時. 喺排隊途中先發現原來成個樂園都播緊聖誕版背景音樂, 大阪環球影城都係咁. 日本喺聖誕氣氛呢一方面都算做得幾徹底, 老實講其實唔係人人頂得順, 但好彩嘅係每個園區都會用返佢哋嘅獨有版本, 不致於咁悶. 而且樂園唔同地方都有聖誕裝飾, 聖誕氣氛好濃厚.



當排到大約差兩班車就可以上車時.... 突然壞左! 順理成章就係要疏散人, 而走果時仲每人派咗一張通行劵, 上面寫住可以用於Star Tours 同Toy Story Mania 以外嘅所有設施, 好貼心!! 因為最後呢張pass 用咗喺Pooh's Hunny Hunt, 所以唔知可唔可以用於冇Fastpass 嘅設施, 理論上應該唔得, 但如果得嘅話都幾無敵! 亦多得呢張嘢令之後嘅時間充裕咗好多.



又要同HKDL 比較一下, 試過BGM同Mystic 都排咗大半先疏散, 但唔做任何補救措施, 我都好明白CM 們係為左避免派左Re-entry Pass 後會自製人流高峰期, 加重工作負擔而選擇唔派, 都知道壞機唔係你地想... 亦明白雖則香港迪士尼設施平均排隊時間冇咁長.. 但係令人白白浪費左時間排咗咁耐都冇補償真係有點兒不近人情.




跨越時空走返出去Tomorrowland 拎咗Star Tours 嘅Fastpass 先, 然後去玩Captain EO, (其實呢兩個Attraction 喺美國都已經玩過, TDL 人又多影唔到靚相, 大家想睇返嘅話可以重溫美國之旅)



Captain EO 始終係幾十年前嘅技術, 如果唔係MJ Fans, 其實呢個show 係會比想像中悶... 上次美國坐後排, 但今次因為排得前而日本人又係一個極度守秩序嘅民族, 今次坐得勁前!!! 睇3D 坐咁前一定暈啦... Captain EO 當中有隻飛飛下嘅怪獸... 睇到鬥曬雞!! 每場都要排差唔多20分鐘, 所以其實睇唔睇都冇所謂嘅.... 今次玩嘅原因係Captain EO 將會成為歷史. 東京迪士尼宣佈咗會將呢個Theater 轉做Stitch Encounter, 相信第時會好玩過香港好多. 而且因為Theater 夠大, 應該會有Pres-how 同至少兩間房嘅版本. 估下姐, 或者其實佢地係想一間大房過, 又或者劏開改做其他野都唔定.



玩完之後就夠鐘玩Star Tour.  Fastpass 比想像中派得慢, 一直都係派緊貼住現實時間之後一小時嘅Fastpass. 亦因為咁可以容許之後再玩多一次!!

Star Tours the Adventures Continue 有2個出發畫面, 3個開頭3個中段同3個結局. 所以有幾十種唔同嘅組合, 每次玩都會有唔同經驗. 但係... 其實我已經唔記得左喺美國玩嗰段片係咩... 所以對於遊客黎講可能N 個組合同單一片段係完全冇分別... 唔知Iron Man 會唔會有多於一段片呢?



玩完行返出黎, 原來.. 已經差唔多Parade... 趕去拎Haunted Mansion Fastpass 就順便睇埋巡遊. 時間係剛剛好, 但大家都知道日本人等Parade 嗰種精神同耐性係幾咁值得人敬佩... 恕我冇可能同佢地爭位!

同時都發生左段小插曲, 因為當時企正喺巡遊道路開端位置, 呢個位同時係Haunted Mansion 嘅主要通道, 所以被CM 勸籲離開, 唔係成日黎或者唔係本地人, 根本唔會明佢地想表達D咩, 一開始以為佢地係唔俾我睇... 開口問佢地又唔答點解... 有少少唔知做乜咁.. 不過都係語言問題姐.. 最後都能夠搵到個位行近少少睇.

 

Happiness Is Here Parade 係TDL 30週年慶祝活動之一. 呢個Parade D 花車的確好靚, 好多Detail 位, 而且多Character 亦多Dancers, 成個Parade 又夠長. 睇完有一刻覺得香港嘅飛天巡遊被比下去!! (其實認真覺得FOF 呢個巡遊靚就幾靚, 但好快睇悶...) 相反Happiness Is Here Parade 用色好Sharp, 襯埋個陽光藍天就更加無敵. 首歌旋律亦好吸引人. 睇完印象好深刻.



香港唔係唔好睇, 但保養呢方面就真係要落多D 功夫. 氣球折舊率咁高, 檢查就應該要更加頻密啦...




http://www.youtube.com/watch?v=ntX70aabQe4

睇完Parade就黎到Fantasyland 玩, 呢邊個小小世界Wait Time 好短, 就算Parade 完咗都只係5分鐘. 未玩過水浸版, 仲要係Holiday Version. 入去吧!




畢竟已經好耐歷史, 已經預左室內燈光冇香港咁先進同光猛, 而且部分Scene 成間房都喺水面, 真係好似入咗浴室咁... 難怪當年WDI 訪問都話係刻意將HKDL 個版本改善. 不過Holiday Version 啲裝飾同服裝好靚, 值得一玩!! 請恕我直言, HKDL 之前出過嘅「聖誕版」好廢, 完全唔係嗰回事... 好慶幸佢地自動fade out...

http://www.youtube.com/watch?v=P1ZPmtl08gA

下一站黎到Pooh's Hunny Hunt, 用左Big Thunder Mountain 張Fast Pass. 相信大家都知道佢係全球第一個擁有Trackless Ride System 嘅Disney Ride, 再加上係全球獨有故事, 又係必玩. 比香港嘅版本正好多. 唯一唔鍾意Pooh 個樣..... 點解搞到佢成個小新咁....



玩完PHH 出黎又有另一個節目要睇 - 聖誕巡遊, 今次好好彩搵到個較前排嘅位置坐低. 東京迪士尼普遍Seasonal Parade 都會有Show Stop, 不過就唔係香港咁俾小朋友出去玩絲帶氹氹轉, 而係大家一齊跟住車上嘅迪士尼朋友同舞蹈員做動作. 而佢哋啲動作都較多且複雜, 所以喺巡遊開始前都會有Guest Flow CM 跟隨廣播教大家試一次, 觀眾都會好自然地跟住學. 當巡遊隊伍到達並進入Show Stop 時自然大家就會一齊做動作, 場面幾壯觀.









香港迪士尼自從High School Musical 同史迪仔個Street Party 後就喺每個新show (連Day Parade) 都加入interactive 元素, 不難想像此舉係配合香港人口味. 呢種show stop 玩一分鐘遊戲嘅習慣就繼續傳承落去, 相信Night Parade 都會有Show Stop. 嗯... 但今次呢個Show Stop 應該就唔會叫你黑媽媽出去玩, 而係停低俾你玩轉色.







喺X'mas Parade 同Night Parade 之間都玩得好多野, 就例如終於玩到一早已經拎左Fast Pass 嘅Monster Inc., 呢個Ride 需要你用電筒照啲怪獸出黎, 有互動位, 但最重要係景物做得好細緻, 就好似真係去咗Monstropolis 一樣. 個人覺得玩果時千萬唔好太依賴去用電筒照, 因為咁反而會錯過咗好多野.



而佢個Waiting Area 係完整地模擬返MI個大堂, 再一次讚嘆WDI 功力!! 話說呢個Ride 嘅時間設定定於電影《怪獸公司》之後, 即係代表毛毛已經咗公司嘅CEO同發現小朋友笑聲所帶黎嘅能量大過驚叫聲. 可能因為咁, 所以呢個版本感覺上節奏比較快，而且比較歡樂. 最後又有Audio Animatronic Roz! 又係同Guest 有interactive. 不過今次講日文完全聽唔明.



http://www.youtube.com/watch?v=H0lYRy9ElKI

Haunted Mansion Holiday Nightmare. 其實我一直都好想玩DLR 個版本, 但考慮過如果為左玩Holiday 版而要Park season 去就會玩少好多野, 所以最終都係揀左五月淡季去, 好配服WDI 可以將整個Ride 顛覆!! 今次黎到東京, 怪誕城之夜嘅版本都係必玩!! 不過人就係得一想二, 唔知道TDL 同DLR 原版個分別係咩, 所以都想玩一次TDL 嘅正常版本, 始終比較鍾意原有嘅故事. 我覺得呢邊個版本幾有心思, Pre-show Room 並唔係一部向下嘅升降機, 而係天花緩媛昇起!! 最後頭頂出現嘅巨大Jack 頭, 親眼睇到好震撼! 鍾意怪誕城之夜嘅朋友一定要去玩一次! 但我仍然覺得美國原版會正過日本版.



http://www.youtube.com/watch?v=MidJ4cYzPV4

喺Parade 前一小時KO 埋Fantasyland 三個經典Darkride - Pinocchio, Snow White 同Peter Pan. 三個Ride 都係玩過, 但唔知係咪真係因為同語言有關, 當你聽唔明嘅時候就會加強其他感觀功能, Pinocchio 同Snow White 架車原來郁得好快!! 有時啲野都未睇得切就行過咗! 玩Pinocchio 嘅原因就唔需要講, Peter Pan 個故事都好完整, 但係架車好似好唔穩陣咁, 好似好易撞到啲AA, 所以坐果時唔敢亂郁!! 而Snow White 就... 好可惜Magic Kingdom 個Snow White 已經成為歷史... 因為東京呢個版本同DLR 版本一樣... 但全個Ride 得一下出咗Snow White…而Magic Kingdom 版本就較多Snow White. 其實唔明點解要Cut Snow White...

一個鐘玩完三個Dark Ride 後就剛好趕得切睇Night Parade, 都係嗰句, 唔同日本人爭位, 所以冇乜點影相呀... 不過唔駛講都一定知係靚野, TDL 呢個Electrical Parade 係最多新車新技術嘅一個Disney Night Parade, 其實.... HKDL 今年Paint the Night Parade 真係冇可能可以比得上.... 無奈金生開左金口要比較... 唉... 我會期待佢所帶黎嘅效益同令到樂園又多一樣野玩, 但對個Parade 本身冇乜期望.... 你了解HKDL 一貫Parade 規模嘅... 到喉唔到肺係理所當然..











講返東京版, 最神奇地方係佢地連呢個Parade 都有聖誕版本, 所有車都有聖誕裝飾! 佢哋樂園聖誕氣氛真係好濃厚. 雖則日本只係當佢係一個普通Event而冇任何宗教意義, 但睇得出好重視呢個節日好落本去裝飾, 可能同營利有關呱... 唔知呢...

Parade過後, 再返去Big Thunder Mountain. 因為DLR Rehab 緊玩唔到... 所以一定要喺呢邊玩一次! 我鍾意佢不斷穿插山入面啲岩洞, 而且整段旅程都幾長. 香港Grizzly 都好玩, 但唔夠長. 其餘嘅.. 兩者都有各自好處, 唔比較. 玩完之後已經8點半, 詢問下得知當晚煙花因為強風而停演. 唔緊要, 唔睇TDL 煙花都唔會係損失, 就這樣離開了!

下一篇: Tokyo Disney SEA