Big Finale Chapter 3 - Tokyo Disneysea (日本之旅完結)

2013特別企劃終極篇行程主要都係Theme Park, 到訪過大阪環球影城同東京迪士尼樂園, 今日黎到日本最後一站, Tokyo Disney SEA.

一早喺酒店食完個豐富早餐, 去到正門都差唔多9點. 呢日並唔係日本公眾假期, 但係都見到樂園有好多人! 

心知不妙, 都估到Toy Story Mania 會排滿人, 所以即刻衝過去拎Fast Pass, 但係都已經太遲. 我諗唔到可以用咩好正面好得體嘅文字去形容眼前嘅情景, 只能用恐怖黎表達呢一刻嘅心情. 之後呢個Ride 全日都要排至少130分鐘, 所以今次同佢無緣了. 不過好彩喺DCA 已經玩過, 今次Skip 左佢就算吧… 真心覺得呢個Attraction 好好玩. 為香港有個Toy Story Land 而冇一個真正Toy Story Ride 感到婉惜.

Tower of Terror就喺Toy Story Mania 旁邊, 就拎咗佢張Fast Pass先, 等陣同大家去探下HighTower 同Shiriki Utundu.

依家先向Duffy嘅大本營Cape Cod出發!

Cape Cod係由American Waterfront行過鋼橋, 稍微兜過一個小懸崖就到嘅一個地方. 一入到黎就見到周圍都係Duffy 嘅裝飾佈置, 好似進入左另一個世界咁. 就算我唔係一個喜愛Duffy 嘅人, 但黎到Tokyo Disney SEA 如果唔搵Duffy, 都似乎有點說不通. 日本Fans 對佢嘅瘋狂程度真係好誇張. 入到去幾乎有一半以上嘅賓客都有Duffy產品喺身. 無論係掛袋, 爆谷桶或者手提公仔都有. 更誇張嘅係見過一個男人拎住隻最大Size嘅Duffy周圍行, 亦都有家長將小朋友打扮到成隻Duffy咁樣, 都幾受途人歡迎!

入到Cape Cod間Duffy專賣店, 大家不斷走黎走去咁揀Duffy商品. 而旁邊間餐廳更加要排隊入場…. 太誇張啦呱… 初時見到只係食下漢堡包餐, 再加隻Duffy甜品杯, 又唔會賣斷貨嘅, 有咩咁值得排呢? 原來因為呢度有個Duffy嘅專屬表演, 可惜知道嘅時候已經冇得睇. 總之Duffy係一個好成功嘅Character, 日本本土揚威到全球Disney Fans 都鍾意佢. 最緊要係帶動到消費.

喺呢個時候上網check check wait time, 見到大部分受歡迎嘅Ride 都已經至少要排100分鐘. 所以就向啲少人排嘅設施著手. 20,000 Leagues Under the Sea. 一個坐潛艇嘅遊戲. 只係一般, 而且個弧型窗反光果時睇野睇得幾辛苦, 不過巨型魷魚果幕值得一讚.

下一站出發去Arabian Coast, 呢個園區以阿拉丁為主題. 入到去會俾成座城牆圍住, 而小巷又做得好窄, 真係好似身處喺阿拉伯一樣. 玩神燈劇場, 排得有啲耐, 但可以夜晚黎, 因為冇乜人排.. 

真人同3D畫面同時演出, Effect唔錯而演員又同台下有互動, 假如聽得明日文會睇得好開心. 只可惜我聽唔明. 如果你都唔識得日文, 不妨考慮一下借部字幕機. (圖片取自: 2011暑假遊disneysea)

大約11點, 樂園愈來愈多人, 去咗Lost River Delta睇下兩個ride要排幾耐. 決定拎Indiana Jones Adventure 嘅Fastpass，再排Raging Spirits. 等候時間係130分鐘, 最後發現一件好無奈嘅事實. 就係原來呢個Ride 係有Single Rider! 但係我喺佢入口搵唔到相關資訊. 如果我知道嘅話冇可能唔排Single Rider! 浪費時間! 仲要玩完之後覺得呢個過山車唔太刺激, 真係覺得好唔抵. 而因為咁喺當日餘下時間我幾乎一去到其他Ride嘅入口都問一次有冇Single Rider. 所以大家喺玩之前最好就問清楚CM先再作決定喇!

之後就返轉頭去玩Tower of Terror, 順住Port Discovery方向咁行返去. Aquatopia 比較小兒科, 而StormRider因為又只係Theatre式遊戲同排好耐所以冇玩. 咁不如食啲野先, 食緊野時見到Mr. Incredible同Elastagirl出現同Guest影相. 喺度想講一講, 呢度嘅Meet and Greet都係唔會企定定同你影相, 而且仲會同Guest有互動. 我見到Mr. Incredible同一個身型健碩嘅男人玩拗手瓜, 仲讓賽輸俾對方.Character 唔應該只係做一個識郁嘅Backdrop俾人影相, 而係要有呢類互動先會令Guest有更深刻嘅感受, 先更加能夠帶出果種Magical嘅感覺. 算啦… 之前DLR 已經講左一次. 

終於黎到Tower of Terror… 期待咗好耐! Hightower Hotel嘅主人Harrison Hightower III, 同我地認識嗰位 Lord Henry Mystic 一樣都係S.E.A. 嘅成員. 入到酒店，第一樣見到嘅就係Hightower 三世坐果部升降機嘅殘骸. Preshow部分Shinriki Utundu中途突然消失果一下真係做得好犀利. 基本上從每一個角度都睇唔到破綻. 跟住就步入貨倉區等待搭升降機, 一直行入去發現佢嘅收藏品甚至比Henry Mystic更多更大. 到搭升降機時, 佢嘅離心力雖然唔係好大, 但係都令人有出奇不意嘅驚喜. 但我覺得佢過肩式安全帶太有安全感了… 冇美國嗰種成個人離開座位飄喺半空嘅感覺. 

行下影下相之後就返去Mermaid Lagoon睇Mermaid Lagoon Theatre, 呢個Show 會喺今年四月永久關閉, 因為會有新版本取代. 成個show都需要觀眾向上望. 啲魚﹑Ursula等等都係喺上空出現, 當中Ursula啲觸鬚同雙手都控制得好流暢, 不過個Show就短咗啲. 唔知會唔會有機會再黎可以睇佢嘅新版本呢? (同樣呢個劇場都可以租到字幕機)

再食少少野醫左個肚之後就衝返出Mediterranean Harbor睇Fantasmic!. 睇嘅角度雖然比較差, 但都睇到成個海面發生咩事. 我覺得節奏就有啲走馬看花嘅感覺, 但水花, 水幕等等都做得好好, 而且音樂方面都好好聽

再次行到返去Cape Cod, 再睇下商品, 食個甜品, 其實佢哋出啲杯碟實用性就真係唔高, 但若果要同香港嘅比較, 設計的確有心好多, 當作擺設都冇問題, 難怪咁多人都會黎買.

夠鐘去Indiana Jones Adventure. 其實架車都有一定搖晃幅度, 而且故事唔同DLR, 又係俾噴煙出黎嗰下嚇左一嚇! 出返黎先發覺原來玩嘅途中影咗相. 而且冇加任何Logo 遮住你個樣, 東京迪士尼商品設計用心令到賓客心甘情願拎出銀包俾錢, 但香港迪士尼喺商品方面就真係有好大進步空間. 而且唔改善質素之餘只係玩弄推銷技巧, 例如高消費Magic Access Member 送小禮物呢啲… 真係有點做得太過火…

見冇乜人, 就返咗Arabian Coast玩埋其他設施. Jasmine飛毯排隊區入面啲磁磚畫好靚, 飛毯亦可以控制傾斜度, 應該早上玩睇到風景會靚啲, 而隔離就係Sindbad’s Storybook Voyage, 以《仙巴七海歷險記》做主題嘅船上之旅. 雖然牌面上好似小小世界, 但入面啲AA 係Albert 質素. 而且佢個主旋律好好聽, 加上佢排隊時間全日都唔太長, 其實都值得玩下. 最後就係佢個Double Deck Carousel, 每一轉都可以坐到百幾人, 而且又有得坐神燈精靈. 幾特別. 

兩日都因為大風關係取消咗煙花, 真係唔知係咪整定. 哈哈. 最後就抱住呢個遺憾離開, 出發去機場了. 

後記：

多年前去過東京迪士尼, 當年仲未算係一個迪士尼Fans. 所以今次去嘅感覺好唔同, 以下係我對東京迪士尼嘅感想同小發現, 有部分地方都算係我對開業8年嘅香港迪士尼嘅一啲期望. 

1)
喺Universal Studios 係冇查袋呢件事, 其實我都冇諗住帶野食入去. 只不過喺等緊入場嘅期間去買左杯咖啡飲, 而喺閘口因為拎住杯咖啡所以俾工作人員(唔知佢地點稱呼自己) 叫我飲完先好入; 而佢地都講到明如果離開左之後同一日係唔能夠再返入去, 因為有好多人都出閘行過去CityWalk 食Lunch, 咁我又覺得呢個制度係可以接受嘅, 而且影城內都仲有好多選擇. (而Universal Studios Hollywood 係可以出左去行完City Walk 再返) 唔知將來HKDL 開左Downtown 之後會唔會有同樣做法去保障自己餐飲收益呢? 有兩個Park 同Park Hopper 門票應該就冇可能實施到.
到東京迪士尼, 當日為左慳錢同慳時間, 所以買個包入去食, 而喺大閘外有人Check袋, 只係望一眼就俾人通過. 我覺得佢哋對賓客好信任, 又唔係話HKDL 唔好嘅…. 因為香港客源唔同, 隨時會帶個火鍋入去打… 所以覺得現時嘅搜袋程序都可以接受. 

2)
喺USJ 嗰篇都有提到遇見位好有Heart 嘅船長…但並唔係當中少數, 可以睇得出佢地每一個非常熱愛同尊重自己份工作. 迪士尼方面, 全部CM都好熱情而且好有禮貌. 願意主動解答問題, 即使我用英文問而佢哋英文程度有限, 佢哋都會盡量去答. 唔只係樂園, 我喺日本街頭問路, 佢地都唔識得講, 但一定會講到你點頭了解為止. 

3)
樂園好識得安排CM 提供Magical Moment, 雖則唔會派貼紙或者玩小遊戲, 但我遇到嘅兩個Magical Moment都好印象深刻: 第一個係喺迪士尼樂園排緊隊買小食期間, 一位清潔嘅CM喺度表演花式掃地, 其實佢就唔算掃緊地, 而係不斷交叉腳咁行, 然後用腳控制垃圾鏟嘅方向. 我唔知呢個會唔會係Entertainment 扮清潔而做一場表演, 但真係好深刻. 另一個喺迪士尼海洋入面發生, 見到一個CM向牆指住, 同賓客講咗兩句野之後就走開咗, 而大家就突然定曬格喺度舉機影相. 細看之下發現牆上有一個隱藏米奇. Magical Moment真係唔需要多, 但必需要出奇不意. 香港喺呢方面可以嘗試學下, 其實香港嘅Hidden Mickey唔算少, 有時間當搵個人陪你吹下水都好啦. 

4) 
禮貌方面日本人認左第二都唔會有人認第一. 基本上全個日本都係咁, 講野永遠係心平氣和, 開開心心嘅語氣, 而好多時見佢哋由後台出黎或者入返去時(其實搭鐵路都會見到). 就算冇人喺附近佢哋都會先鞠躬然後繼續行出黎或返入去. 以表示對客人嘅尊重.

另外有一件小趣事值得分享, 喺東京迪士尼樂園, 當我坐低等巡遊時, 隔離一對日本情侶主動讓張蓆出黎俾我坐, 嗰一刻真係好驚喜! 於是我決定送幾張香港迪士尼貼紙俾佢哋作為謝禮, 雖然我唔識用日文解釋, 但佢哋見到就非常開心, 仲送咗啲暖包同零食俾我回禮, 反而搞到我更唔好意思. 最後喺parade出場前同佢傾咗一陣計, 呢個經驗都幾有趣. 

5) 
硬件方面, 一直我都話東京迪士尼係起得靚. 只不過我唔鍾意佢啲Show 咁長咁悶姐… 成個環境都好靚. 每一個地方都有好Detail嘅裝飾, 雕像等等. 而所有小食亭同商品車都係永久性並擁有自己名字, 只賣一樣食品, 連飲品都要分開另一檔細車仔或者係自動販賣機. 咁樣絕對係會加快速度同幫助分散人流. 站於CM 角度, 長期性嘅小食亭, 都唔駛日曬雨淋. 

商品車仔檔大部分都比香港更細 (大約係迪士尼站嗰架咁大）, 而且唔會賣多類型產品, 通常都係比較細體積嘅匙扣或者卡套等. 亦會因應季節如冬天專用嘅潤唇膏, Hand Cream, 頸巾等. 相反香港有理冇理將所有店鋪都有嘅都塞曬上去, 大中小型貨品都有, 反而令貨品類型好重複. 希望可以推出更多有特色商品啦…

6)
商品種類方面, 其實我覺得USJ 好少野賣, 重覆性多而且最重要係太走可愛路線… 真係買唔落手, 原本有位朋友好鍾意恐龍, 好想喺Jurassic Park買野俾佢, 但間Shop 咁大竟然有七成貨品都係賣緊其他野. 最尾我咩都冇買到. 相反新加坡同美國都忍唔住手買左好多野. 

迪士尼就講得太多, 包裝同設計已經讚過好多次. Donald公仔設計比香港嘅得意太多啦! 香港呢, 算啦如果我再提封咀Donald毛公仔係會完全冇得比, 普遍商品質素都冇令人一拎上手就想走去俾錢嘅衝動. 2007年之前都仲會忍唔住買, 但之後出黎出去都係差唔多, 同埋一幅圖出50樣商品呢一下真係仍然接受唔到. 更甚係近期啲商品已經可以用醜樣黎形容… 真係好難令人買得落手.

東京迪士尼商品實用性較高, 有大部分係適合年青人或者全年齡使用. 但香港就出得太多兒童向產品. 所以我冇可能做到高消費MA. 
7) 
因為今次喺聖誕期間去, 所以不論係兩個Theme Park, 其實周圍都有好濃厚嘅聖誕氣氛, 而且所有園區都會有自己獨特嘅聖誕歌, 做得太徹底啦! (HKDL 都有, 不過係黑色世界期間) 

香港迪士尼設計三個新小園區時, 考慮香港人鍾意影相所以整一大堆影相位出黎, 如果可以加入更多節日裝飾會更好, 三個新Land 位置偏遠, 黎緊兩年重點又會返返去大街, 到Iron Man 更加拉到去Tomorrowland, 如果三個新Land 都冇特別裝飾 / 表演吸引人, 應該會越來越冷清, 情形就好似擴建前嘅Adventureland 一樣. 

8) 
不得不提CM們嘅戲服, 每個設施都會有專屬戲服, 仲有獨特logo掛喺身上. 令到個環境好多元化, 香港迪士尼… 我都明白一個Land 一套衫喺人手管理安排上係會更彈性, 同埋唔需要預留咁多位放衫. 但都希望可以嘗試下出多幾款戲服去營造一個更令CM同賓客都更加投入嘅環境. 

香港迪士尼, 就快唔係最新嘅Disney Park, 當踏入十年就唔可以再有藉口俾D 時間佢改善, 已經俾左十年時間你啦. 如果仍然用返2005年套準則, 呢個樂園只會不停原地踏步. 講又講過鬧又鬧過, 硬件其實真係冇問題, 但軟件同管理手法真係好需要作出審視. 希望不久將來香港迪士尼樂園可以同其他大型Theme Park睇齊. 

進入Florida 之前, 仲有一篇開左個頭但係未完成的... Legoland Malaysia.....