Big Finale Chapter 4C - Magic Kingdom Day 3

黎到Magic Kingdom 第三日, Day 1 時有為大家介紹過一個Christmas hard ticket event, 晚上七點就會散Day Guest 嗰個聖誕活動呢. 其實呢個Event 去到12月中聖誕時候就會完結. 一個普天同慶嘅日子又點可能拒人於門外呢? 所以臨近聖誕呢幾日可以免費睇晒所有Christmas Show 嘅日子, 個park 自然會人頭湧湧.

既然之前玩左兩日, 又睇左大部分嘅Show, 今日主要Target 聖誕表演. 所以朝早喺酒店休息, 然後食左個Character lunch, 大約一點先向MK 進發.

今日比之前兩日用多一倍時間先到達目的地, 周圍都人頭湧湧. 都玩唔到啲咩啦…. 拎左Sorcerer of MK 咭之後就搵個靚位等睇聖誕巡遊.

當時只係兩點幾, 仲有一個鐘頭先開始巡遊, 但已經有唔少人等緊巡遊. 我原本想搵個第一排位置, 但行左兩圈都搵唔到一個好嘅位置, 於是退而求其次搵BB車陣. 喺美國迪士尼, 好多人都會租BB車, 而呢啲BB車多數都會泊喺巡遊路線兩旁第一排位置. 企喺堆BB車後面, 就算唔係第一排都可以確保前方視線唔會被遮擋.

等緊巡遊期間, 打開MDW 個手機程式睇睇, 發現Peter Pan’s Flight Wait Time 係180分鐘, Space Mountain 150 分鐘, Big Thunder Mountain 120分鐘, 就連平日唔駛排隊嘅Tree House 都要排15分鐘. 同前幾日Wait Time 相比簡直係差天共地….


終於等到巡遊開始啦! 其實DLR 聖誕Parade 一直係我最期待嘅Parade, 但WDW 呢個巡遊亦都遠超我對佢嘅期望. 因為唔單止花車靚, Character 多首歌又好聽. 仲有好多好多令你意想不到但又同聖誕有關嘅元素.

巡遊一開始都係以Character 同Guest 互動開始







之後就係Mickey Minnie + Duffy 坐住第一架車登場, 仲有聖誕樹同禮物



當然一眾Dancer 都會著住聖誕服飾



之後就係Donald 同Daisy



一班滑雪嘅Dancer. 見到呢個場景真係好似去左一個落雪嘅地方過緊白色聖誕

Chip & Dale 堆緊雪人, 好想同佢地一齊堆. 

之後就到七個小矮人, 而且仲要係聖誕版, 好想同佢地M&G. 不過佢地只會喺Hard Ticket Event 出現. 即係要另外俾多70蚊美金. 



有小矮人就當然有Snow White 同the Prince



Cinderella 坐住南瓜車出現. 見到白馬 (雖然係馬仔) 再見到南瓜車, 就自然幻想到Cinderella 係因為聖誕關係, 喺背後城堡走出黎與民同樂歡度聖誕. 覺得自己好似置身喺童話故事入面咁. 好Magical~~!




之後就到其他公主






喺香港嘅Parade 去到呢一刻一定完結, 聖誕老人都未出又點會完呢? 高飛同佢架糖果車!




糖果屋! 係咪已經感受到濃厚聖誕氣氛?

咁薑餅人有無再加強你嘅感覺?



聖誕玩具呀!! 當然會有Toy Story 人物, 連Bo Peep都有份.

仲有我一直好想喺香港迪士尼聖誕期間巡遊出現嘅玩具士兵管樂隊! 以前Let it Snow Parade 最初個介紹提到有玩具士兵, 我仲以為係佢地. 點知係一班分唔到男女嘅奇怪士兵

呢班玩具士兵真係演奏緊, 呢個係令到我覺得最Magical 嘅地方, 佢地外貌真係好玩具, 但係又可以吹奏到音樂, 再加埋步操. 令我讚嘆不已!

Finale 當然係馴鹿同埋坐喺雪橇上嘅聖誕老人! 為Parade Route 兩旁嘅Guest 送上聖誕祝福

睇完Mickey’s Once Upon a Christmastime Parade, 更期待Disneyland Christmas Fantasy parade, 但呢兩個Parade 都成為我最愛嘅幾個Parade之一. 實在有太多令我想不到嘅元素. 絕非香港迪士尼以前個Let it Snow 咁喺花車掛下聖誕裝飾同幫Character 換下聖誕衫就算. 薑餅人、糖果屋、滑雪者、玩具士兵、馴鹿嘅出現, 將聖誕氣氛逐步提升.

唔敢奢望香港迪士尼會有呢個質素, 但都好想佢地會有一個真正屬於聖誕嘅Parade, 而唔係Street Show.

如果買Hard Ticket嘅話, Mickey’s Once Upon a Christmastime Parade就會係夜晚舉行, 美國小鎮大街會落雪. 聖誕氣氛一定會比日間更濃厚.

之後就透過Fast Pass+ 玩多次Big Thunder Mountain 同Splash Mountain. Fast Pass + 比傳統Fast Pass 優勝嘅地方就係可以一早book定自己想要嘅Fast Pass, 而唔優勝嘅地方就係一日只可以book 3 個ride/attraction, 有啲樂園仲限制左, 一日只可以book 一個Headliner Attraction. 但由於Fast Pass+ 仲係試驗階段, 存有好多變數, 所以唔講咁多.

玩完之後就去返城堡前面睇Stage Show, Celebrate the Season 內容係講述聖誕節臨近, Mickey 送一份聖誕禮物比Minnie. 打開禮物一睇, 原來係Mickey 請左一班好朋友同佢地一齊過聖誕. 呢個stage show 亦充滿聖誕氣氛, 不能錯過! 不妨早啲霸位.







今日Magic Kingdom真係好多人, 連買野樽裝飲品同去洗手間都大排長龍….. 女廁排隊就見得多, 真係冇諗過男廁都要排隊… 事實上玩唔到太多野, 都係搵下Character 影相就算.

話咁快就已經天黑, 又係時候黎到城堡前面, 有另一個聖誕晚間表演, Cinderella's Holiday Wish, 大家見到sparkling castle, 其實就係呢個亮燈儀式之後著燈, 十一月中至一月初每晚都有得睇




其實個show 並唔長, 但係最初星閃城堡都唔係好長, 係要夢幻嘅話, 只要幾分鐘都會好感動. 平日就算冇LED 嘅城堡已經夠晒靚, 亮左燈之後真係會忍唔住想撲埋去攬住佢, 而睇佢亮燈嘅過程更加係唔能夠用文字可以表達到, 值得大家喺聖誕期間黎到Magic Kingdom睇






睇完呢個Castle Lighting show, 時間黎到六點半, 已經好多人開始霸位準備睇Electrical Parade 同煙花Holiday Wishes, 但如果我話巡遊係九點先開始, 而煙花係十點先放… 你會唔會覺得WDW 班Guest 其實都可以好盡? 佢地可以為個巡遊兩個幾鐘… 唔好以為只係中央廣場先有人聚集, 其實整條巡遊路線都有人等緊. Electrical Parade 已經睇左, 而煙花就等夜啲先睇, 依家去Tomorrowland 睇另一個Christmas Show.

呢個show 雖然比城堡前嘅stage show 細型啲, 但都幾好睇. 好符合Tomorrowland主題, 搵返喺呢個land先會出現嘅Character, 即係巴斯, 史迪仔同Mike 表演.





睇完個show都只係7:30, 開MDE 手機程式check wait time. 發現所有Ride 仍然排緊長龍, 途中經過Hub, 發現已經越來越多人, Parade Route 已經排左三四行人, 再唔搵位就會好似上次咁比班外國人遮哂, 於是加入等待嘅行列.

上次睇左Electrical Parade 但睇唔到Celebrate the Magic 呢個Projection Show, 而煙花 Holiday Wishes又係全新嘅, 仲記得Day 1 時為大家介紹過外國網友推介嘅三個睇煙花嘅好位置嗎? 今次就試左去地圖上嘅２號



呢個位置既好處就係欄杆前面係一個湖, 湖後就係Castle, 所以冇人可以擋到你. 不過由於佢唔係正中位置, 所以睇煙花時就唔會喺正城堡正後方出現, 亦因為會影響效果所以比較少人. 同埋呢個位置係完全睇唔到Electrical Parade, 所以如果大家有機會去嘅時候就要做一個決策啦

依家全個都有Wi-Fi, 所以大家悶嘅時候都可以上網打機, 時間都冇想像中過得咁耐. (我聽過外國旅客話實在估唔到香港迪士尼酒店竟然冇免費Wi-Fi, 好難以置信) 到9:40, Celebrate the Magic開始, 呢個projection show 係以城堡為背景. 投射迪士尼故事. 果然呢個位置睇得好清楚!

睇完Celebrate the Magic, 就到Firework. 我原本以為呢個firework 都會有好多Disney 嘅經典旋律, 再配上聖誕配樂. 但實情係成個煙花都係播緊聖誕歌. 城堡上仲有有少量Projection effect, 令成個樂園充滿聖誕氣氛. 睇完個感覺係, 不枉我為左睇呢場煙花等左咁耐. 值得!

睇完煙花就10:30, 大部份人群都向Main Gate 方向離開樂園. 但我就逆流而上, 即刻衝玩! 除左幾個最受歡迎嘅Ride (三座山同PPF) Wait time 仍然係好高之外, 其他ride 都係直入. 所以我喺10:30至1:00呢兩個半鐘成功將大部份attraction 重新玩一次, 心滿意足地離開! 係, 你冇睇錯, 聖誕期間Magic Kingdom 係close 凌晨一點!

Magic Kingdom 完成!