Big Finale Chapter 5 - Animal Kingdom

三日Magic Kingdom 之旅完結, 其實睇下你去嘅目的係咩, 當時去Disneyland Resort 三日玩一個park 真係唔夠. 但因為東西岸有部分Ride 係重覆, 而且Magic Kingdom 其實冇Disneyland 咁密集咁多野玩, 所以三日時間尚算充裕. 下一站 – Animal Kingdom!





Animal Kingdom 係Walt Disney World 四個Park 入面年紀最輕嘅樂園, 喺1998年先開幕, 亦係咁多個Park 入面佔地最大嗰個. 點解會咁大? 因為呢邊養左好多動物, 但Disney 並唔係一般外國野生動物園咁俾好少地方啲動物棲息, 而係分配左一大片草地俾動物有更多活動空間. 如果你想睇動物, 又想玩下獨有Ride 的話, Animal Kingdom 其實好啱你!



香港迪士尼今年年初換左新閘機, 但新閘機仍然保留轉閘 (冇法… HKDL 太多唔守秩序嘅遊客…) 而依家WDW 所有Theme Park 都已經以MagicBand 手帶取代晒傳統閘機, 令到入場好輕鬆簡便. (下圖係網上搵)




真係唔好意思, 新年都過左, 但仲係講緊聖誕節. 呢邊入口都有一棵巨型聖誕樹. 而呢棵聖誕樹上嘅裝飾全部都係動物. 切合主題.



為大家送上Animal Kingdom 嘅map:




Animal Kingdom 嘅格局好特別, 幾個以世界不同地方為主題嘅園區圍繞一條河流而興建, 而中間有個島被河流分隔開. 佢就係Discovery Land, Park Signature the Tree of Life 就係位於呢個島上.



河嘅四周分別係 Oasis (入口)，DinoLand U.S.A., Asia, Africa 同Camp Minnie-Mickey. 相信大家都有留意到Disney 已經公佈左Animal Kingdom 將會進行有史以來最大型擴建項目 - Avatar Land, 所以Camp Minnie-Mickey 已經永久關閉. 而下面呢張地圖亦已經刪走左該區域.



今次旅程就沿住河流逆時針玩左幾個重點Ride 先

DinoLand U.S.A., 睇個名就知道係同恐龍有關, 原定香港迪士尼樂園最初構思Adventureland 都有一個以恐龍為主題嘅設施 (因為我地個Adventureland 風格係跟Animal Kingdom 而非傳統同名園區). 最後呢個計劃冇成真, 而上海迪士尼就確定會用恐龍園區黎取代Adventureland. 都幾有興趣想睇下會搞成點. 不過喺Animal Kingdom 呢度都可以大約睇到Disney 嘅恐龍設施會係點.



入口就有大大件恐龍化石.



而呢個園區必玩嘅Attraction 就係Dinosaur. Ride 前面都有恐龍, 佢係Disney 2000年上映電影Dinosaur 主角 - Aladar.



內容其實似Jurassic Park. 但加入時光機元素, 科學家帶你返到去恐龍快將滅絕嘅時候拯救Aladar. Disney 又點會同Universal Studios 撞到咁應呢? 主題係類似, 但呢個並唔係一個水上設施, 而係用左Indiana Jones Adventure 嘅Ride System. 一直都好想可以喺香港見到呢個Ride System, 因為會令到人對Dark Ride 沉悶同小朋友先玩嘅印象改變. 可以上Youtube 睇睇POV.

Waiting area, 迪士尼的Detail 還需要確定嗎? 一入到去, 我以為自己去左科學館嘅恐龍展, 佢放左成個恐龍化石喺度, 四邊牆上都有唔少detail 位






第二個必定要玩嘅Ride, 就要黎到Asia. 呢邊有Expedition Everest 同Kali River Rapids. 可惜當日Kali River Rapid 冇開, 所以只係玩到Expedition Everest. 以珠穆朗瑪峰峰頂雪怪為主題. 剩係睇圖都見到座過山車有幾高有幾斜 (過山車已經上左一段路先去到嗰啲屋, 之後仲要再上!) 好玩程度可想而知



呢度就要講解下Expedition Everest 同香港迪士尼嘅關係. 大家都知道2012年開幕嘅灰熊山谷係集合左Disney parks 幾個著名Ride 嘅元素. 包括Big Thunder Mountain 嘅故事背景, Grizzly River Run 嘅灰熊頭標誌. 仲有Expedition Everest 嘅Ride System, 其實灰熊山極速礦車係沿用Expedition Everest 呢座過山車嘅同一個製造商 – Vekoma. 所以兩座山都有一個共通點, 就係倒後行. 而斷軌呢一個畫面更加係出晒名.



不過呢座過山車由於有其他更驚喜嘅位, 所以倒後行一段冇想像中咁刺激, 可能係因為玩灰熊山玩到習慣左. 哈哈. 而最重要係你玩完Expedition Everest 之後, 係唔會覺得我地座灰熊山被比下去! 兩個ride 係不同感覺. 其實WDI 都好錫香港迪士尼.

離開亞洲, 進入Africa 玩Kilimanjaro Safaris. 我地會坐森林探險吉普車進入非洲大草原觀光.



但同之前所講, 由於迪士尼提供左一大片土地俾各種動物棲息. 所以大家唔好期望喺旅程中會接二連三見到各種動物出現, 要落力周圍搵下動物先得




望出去車外嘅景色.. 雖然我未去過非洲, 但眼前呢個畫面的確係幾似喺電視上睇到嘅非洲大草原. 當然呢個版本係危險度係較細.




喺度俾個Tips 大家, 或者你喺之前Trip Report 時已經留意到Magic Kingdom 入面遊客嘅衣著都係偏向單薄, 因為Florida 氣溫再比香港熱少少, 所以動物們食完午飯之後就會喺樹下抖涼, 如果想睇活躍嘅動物, 最好就係朝早十點前去, 又或者將近close park 去, 因為日落而且班動物知道就快有得返屋企, 所以都會特別活躍.












玩完Kilimanjaro Safaris, 就黎到Pangani Forest Exploration Trail, 呢個係其中一條有自遊徑, 沿路會睇到唔同動物, 例如馬騮, 猩猩, 河馬, 狐獴 (即係丁滿) 等等.

跟住就出返去Discovery Island 行另一條自遊徑, 同近距離欣賞the Tree of Life. 樹身由三百幾種動物雕塑組成, 每一次睇都會搵到唔同嘅動物, 係WDI 著名嘅杰作, 值得大家細心欣賞.

呢邊亦有”It’s Tough To Be A Bug”. 內容同加州迪士尼嘅一樣, 所以都唔多講. 但佢個Waiting Area 都係整到好似蟻穴咁, 好逼真!

之後返去DinoLand U.S.A., 入面有幾個俾小朋友玩嘅設施. 例如有個類似Dumbo 咁嘅轉轉設施, 仲有一個家庭式迷你過山車. 呢個過山車後半段, 架車會不斷咁自轉. 除此之外, 呢度仲有攤位遊戲, 同埋可以比小朋友挖掘恐龍化石嘅the Boneyard




之後, 就到Finding Nemo: The Musical. 實在估唔到呢個show 係咁好睇. 睇完之後立即排隊入場再睇. 無論佈景, 歌曲, 服飾都係貫徹迪士尼一向高水準. 而個故仔亦忠於原著, 我從來無諗過Finding Nemo 可以咁樣以Broadway 形式表現出黎. 睇完之後個腦依然不斷Loop 緊入面嘅歌~ Just Keep Swimming Just Keep Swimming~







睇完呢個show之後, 我更加期待Frozen : The Musical, 相信一定好精彩!

至於睇呢個show 應該揀咩位, 因為CM會喺通道上面走黎走去, 所以大家揀走廊後面中間位置, 咁就會睇得更清楚.

巡遊了! Animal Kingdom 呢邊都有個Parade, 其實大家都應該唔會對呢個巡遊感到陌生, 因為香港迪士尼Adventureland 以前都有一個以呢個巡遊為藍本嘅街頭表演 – 森林木偶嘉年華. 呢一篇講左咁多有關Animal Kingdom 同HKDL Adventureland 之間嘅關係, 會唔會令到你對Walt Disney World 有更深嘅興趣?










Mickey’s Jammin’ Jungle Parade (聖誕期間會叫: Mickey’s Jingle Jungle Parade, 花車會加入聖誕裝飾, 而Character 亦會換上聖誕服裝) 係一個小型巡遊, 花車比較細小, 但係好符合主題, 好Jungle 亦有好多「動物」出場. 而佢最特別嘅地方係佢會邀請好多Guests 上花車, 向途人揮手, 我相信對於獲邀請嘅Guest 黎講, 呢個會係一個好好嘅magical moment.











值得講嘅係, 因為配合Avatar Land 擴建工程, Parade Route 有部分會受工程影響, 官方已經公佈左呢個Parade 去到今年六月就會完結. 今次呢個旅程睇到兩個即將成為歷史嘅Parade. 真係好幸運!

Animal Kingdom 篇完結. 不過一定會再嚟! Avatar Land, 等我呀!