起床了! 一打開窗簾就見到眼前呢個景象, 其實雖然我都覺得座山係有點兒奇怪, 但係唔想因為呢個景觀而影響到呢一整日嘅心情, 畢竟今日只係剛剛開始. 但係假若當座山唔存在嘅話, 就係望酒店園景, 其實個View 係好正, 而右邊一大塊地就係將會起嘅兩間酒店位置.
反正早左少少起身, 距離Park open 仲有一段時間, 落去行個圈先. 呢度就係酒店通往Park 嘅人工河道起點, 但由於時間尚早所以仲未有人搭. 隻船睇落都幾靚.
紅鶴, 講真.. 朝早佢地成群無間斷咁叫, 我隔住隻窗以為係蟬叫.... 不過酒店入面都有動物睇, 個感覺原來係好正, 如果我下次再去Animal Kingdom 都會考慮一下住Animal Kingdom Lodge, 其實香港迪士尼公佈第三間酒店張正門Concept Art 都見到有雀烏, 雖然有好大機會呢個只係畫家單方面構思令到個畫面豐富啲, 但係我好希望新酒店個花園會有少少可以同人類有較近距離接觸嘅動物...
返酒店食左個早餐之後就出發, 沿住人工河道慢慢行過去, 天氣清涼, 其實都唔錯.
到入口了. 首先就係去售票處換飛. 雖然個Park 好似好多人, 但同之前講嘅一樣, 呢個新開發區交通好唔方便, 所以其實大家見到嘅有好多都係跟旅行團黎. 換飛係另一條隊, 都唔駛等好耐就拎到飛. 期間聽到有導遊講下午三點集合, 其實同去HKDL 嘅大陸旅行團一樣, 都係唔會玩到park close. 所以最多都係迫半日, 下晝個Park 會少好多人. (所以可能呢個原因, 睇Parade 時已經少左好多人)
入口. 其實就係Main Street, 都係一條商店街, 同埋少量餐飲供應. 個天幕真係好靚. 但係唔知點解有個感覺係當個video screen 壞左之後佢地會繼續hea 佢喺度.....
垃圾桶, 學係正常的.
BB 車同輪椅, 要登上世界級都係要必備.
話說喺地圖架上搵唔到有Times Guide, 黎之前喺個官網搵唔到想要嘅資料已經覺得好糾結, 連個架都冇表演時間表? 咁點plan 行程?? 即刻問位職員, 就俾左呢張手寫時間表我... 冇得影印, 只能夠抄或者影相, 第一下係覺得好兒戲. 但係諗深一層, 我想知道嘅野佢都俾左我知. 如果佢地因為冇印到Show Time 而答唔到我表演時間嘅話就話姐. 但其實依家已經盡左佢地所能解答到問題. 算唔錯.
其實尋日入黎Resort 開始就覺得呢度嘅職員都好友善. 可能呢度始終仲係新, 香港迪士尼剛開幕時CM 們都係好nice, 但依家當一眾舊人做到冇晒表情同感覺嘅時候連新入職嗰班都變得好有態度..... 真係唔知要點返轉頭.
車仔檔. 完全係一樣
行入商店, 盡是熟悉的陳設.
都係好熟悉的感覺...
分成七個區域, 圍住中間個湖. 呢個格局又似係學緊Universal Studios. 但係唔好以為呢度好細... 我低估左佢... 因為佢啲館絕對唔係幾步就行完. 同埋佢圍住個湖有一個細圈, 再有一個大圈.
講開館... 整個行程令到我最滿意嘅就係全部室內館都有免費WIFI, 大家見到小弟當日不斷update 就知, 唔用實在太對唔住自己啦!
路過第一個園區 - 海豚灣, 好有Adventureland 感覺.
馬上就見到第一個館, 睇海豚... 其實... 小弟仍然係對困住海洋生物呢種行為反感... 但係我又未見過白鯨同北極熊... 所以整個行程都係經歷緊內心掙扎....
湖. 盡頭就係海洋奇觀. 個名改到同OP 一樣. 所以呢個Park 對迪士尼其實冇乜威脅, 佢要打嘅係OP. 兩者主題太似地理又近. 我估開左幕之後對OP 入場一定會有影響. 可能都係好事黎.
就喺影緊相嘅時候.... 呢個畫面實在太值得紀錄啦!
燈柱... 佢地每個區嘅燈柱基本上係一樣, 但係最頂頂個decoration 唔同. 都幾detail.
餐廳, 因為未到食飯時間. 所以冇乜人, 正好可以影幾張相. 都睇得出detail 度. 係花過心思去設計同實行.
不過呢邊食野就唔好諗住有正野食... 學校canteen feel... 唔係話中國人對食好有要求咩? 同埋絕大部分都係中式野...
行到入海洋奇觀, 去到呢個位之前已經行左十分鐘, 有好多小嘅玻璃窗 / 水族箱睇魚. 但係一黎到呢度就覺得.... 嘩... 佢個玻璃幕牆係OP 三倍....
小弟睇魚可以睇好耐. 因為有好多品種. 但要趕去下一個景點..
因為我好天真地以為頭先塊大玻璃幕牆已經係尾聲, 點知原來仲有一條全視線隧道. 呢度真係好浮誇
今次小弟黎嘅目的都係為左睇下海洋生物, 因為機動遊戲小弟唔放心玩.. (而事實上佢地座雪山仍然未開) 而最後呢個方針係非常正確, 只係睇D 館都已經用晒所有時間. 呢度係白鯨表演場地, 整個Park有三個表演, 每場20分鐘, 每個表演一日得四場, 但場地都可以容納到好多人, 就例如呢個. 因為小弟早左去排隊, 所以揀到個全館正中心位置黎坐...
呢張相可以話到俾你知個場有幾大... 冇晒位坐之後... 連中間通道都企埋人. 但之前都講過呢度好多都係早走嘅旅行團. 所以或者你可以揀晏少少嘅場次睇, 呢度容納左幾千人, 個Park 其他地方自然會鬆動左.
而個人覺得呢度最正係... 個位好闊!
白鯨... 不過好彩嘅係佢地每隻都會表演唔同嘅項目. 總算平均. 可能每隻只係表演五分鐘.
呢個係其中一個激流設施, 其實見到呢座過山車嘅製作過程, 覺得佢都唔會太危險... 係落水嗰下唔會知唔知日久生繡... 都覺得可以喺新開幕嘅時候試玩嘅, 但係無奈小弟到訪嘅時候仲未開, 亦都唔見到佢地做testing, 如果大家去嘅話, 不妨話返俾我知好唔好玩.
有人問我呢個Park 嘅遊客恐唔恐怖, 其實咪就係HKDL 同HKOP 班遊客, 都係同一班之麻. 都係會攝會打尖, 仲有喺你耳邊大聲叫. 不過呢度係大陸, 俾大陸人包圍都係無可避免. 但好慶幸嘅係呢個Park 冇乜ride 玩, 主要都係入展館或者睇表演. 冇得排隊, 所以感覺還好
呢度係北極熊館, 出面有幾隻棕熊, 話說上個月剛試運嘅時候呢度都係放左隻北極熊, 但係由於呢度係一個戶外地方, 放隻北極熊喺度實在太唔人道. 所以最後安排返北極熊入館, 再喺番禺運幾隻棕熊黎住...
雖然快速有一個後著plan, 但佢地一開始有放北極熊出戶外嘅念頭 (事實上真係放左... 網上有相), 其實都真係不理佢地死活...
館內的北極熊... 係幾活躍. 喺度要提提大家, 雖然黎緊會係炎熱嘅夏天, 但係呢邊幾個極地館都係有寒冷嘅空氣喺窗嘅另一邊滲出黎. 一冷一熱好易病. 帶多件薄褸啦
另一個係企鵝館, 佢地頭頂會落雪. 然後你會見到佢地堆晒喺落雪個位呆企, 係搞笑過OP 啲企鵝
每日Parade 喺三點鐘開始. 其實條Parade Route 係點都大約估到. 但係小弟要慳時間嘅就當然要搵花車出口啦. 沿路問工作人員, 出口就係雨林旁邊. 剛剛行到去就出車.
車就當然唔可能比得上Disney, 但係我想講長隆為左俾人覺得佢地係國際theme park, performer 大多數都係外國人. 而佢地同遊客嘅互動就只有揮手, 無蹈都只係簡單郁幾郁... 似乎冇排舞老師....
不過可能係因為首歌根本唔適合跳舞... 係喎... 首唔太好聽嘅歌不斷喪loop... 而車上亦都冇speaker... 所以你會聽到有機械聲喺花車上傳出黎..
呢個可能已經係成個Parade 郁得最多嘅performer...
Disney on Parade Little Mermaid 嘅水母造型...
但對比個人嘅大小, 可睇得出D 花車係非常大架...
睇完巡遊, 順便去到呢個雨林區域, 呢度有一個好刺激嘅過山車, 其實係呢個Park 少有嘅大ride, 呢度暫時得三個大ride, 其他都係可以喺普通遊樂場搵到嘅小型設施.
不過我都係冇玩到過山車, 而係入左去熱帶雨林展館
入面裝修都非常detail. 係一棵空心樹幹.
我好希望會有食人魚睇...
剛巧見到潛水員清潔... 呢個景象仲受歡迎嘅D 魚!
完成呢個區域之後就要去睇海獅表演. 中間會路過一個老土Fantasyland, 佢地叫做繽紛世界, 呢個園區就真係好長隆嘅遊樂場. 色彩係好sharp 嘅粉紅色... 不過入到去都懶得影相.. 有碰碰車同攤位遊戲, 同埋佢地起左一個個亭, 好似Fantasy Garden 咁俾你同一眾Mascot 影相. (係Mascot 唔係Character)
想講嘅係佢地呢邊都有觸摸池... 魔鬼魚.. 仲有其他海洋生物... 但係我親眼見到有個大陸男人喺水入面抽起左條海參俾佢個仔睇! 如果個個都係咁做... 條海參一日就上水落水幾百次... 呢種民族劣根性真係冇得救..... 好心就唔好整觸摸池啦.. 就算班人唔蹂躪啲海洋生物, 佢地對手咁多菌都係有好大嘅潛在問題. 好不滿呢個區域....
海象山. 有個激流... 呢個就有玩, 因為應該冇乜機會出意外...
其實都係一上一落. 冇乜特別野... 真係衝落去果下會喺兩隻海象之間衝, 感覺都似係會撞埋去咁. 睇以下呢張相會知道一定係濕晒啦. 雨褸係唔少得. 同埋你見到岸邊平台某啲位個地下係濕嘅就唔好行埋去啦, 擺明係有水濺上去先會濕... 眼見好多大陸人企喺度被濺濕, 唔知佢地係咪特登要玩呢個避水濕身遊戲... 但我信香港人同澳門人係醒目.
呢個區都靚, 亦都做到建築物舊化嘅效果. 睇相都唔錯, 但親眼見到嘅第一個感覺係建築物啲色配搭有點兒奇怪. 呢個區有個海獅館, 但係仲未開...
成個park 都有好多Detail 嘅Decoration, 呢架純裝飾嘅捕魚船都有好多props.
裝廳出面亦放有裝飾道具. 我唔覺得呢邊嘅裝飾係好似Disney 咁有back story, 純粹係為左加強環境氣氛. 都叫做得唔錯.
可能海洋公園都有得睇海獅表演... 所以覺得冇乜野... 可能因為已經玩左成日, 所以喺度差啲訓著... (表演場地佈景仲未整好... 有棚架..)
較早入場時講過呢個Park 大部分遊客都係旅行團, 唔會留足全日, 所以由呢一刻開始陸續少人, 玩得好輕鬆, 所以就去返今朝塞滿人嘅地方補返未睇未玩嘅設施. 沿住湖邊向海洋奇觀進發... 見到呢艘純裝飾海盜船... 好detail...
又一間外型好靚嘅餐廳.
有表演. 呢種係新興嘅極限運動 - Flyboard. 以水力噴起使用者, 不過呢個係表演, 並唔係呢度有得玩.
返去白鯨館.
完全感受到寧靜, 個館基本上已經冇人.
呢度仲有個好似Mermaid / Nemo ride 嘅設施, 都係Ride 黎. 而個主角.. 係一條好似Nemo 嘅機械魚.
由Omnimover system.
不過學到個ride system 學唔到safety (或者根本唔在意.) load 同unload 都冇conveyor. 其實係好危險嘅一件事. 慢少少都會俾架車拖住你行.. 所以Disney safety 呢方面真係做得好充足.
個Ride 其實唔知做乜... 有啲好簡單嘅animation. 但係冇乜深刻印象... 比較搞笑嘅係佢地個system 中途停左, 音樂停埋, 全部車都自動轉返正前方, 心諗: 唔係第一次玩就俾我撞正evacuate 咁開心呱? 隔十秒後自動reset, 繼續行....
唔知係咪講緊海洋嘅形成.. 有一段係火山爆發... feel 到熱力...
亦有一段係同旁邊海洋奇觀share 魚缸, 係幾特別嘅.
終於都黎到最後一個園區, 呢度係今朝首個路過嘅區域, 但係因為趕唔切睇呢邊個Show 所以決定最後先返黎睇尾場. 呢個就係我好話估唔到呢個Park 咁大嘅原因, 行左好遠先入到個表演場地... 不過中間都有好多decoration 睇.
仲有吉祥物. 呢一類稱唔上為Character, 因為Mascot 係可以每一隻都做同一套動作而你唔會覺得奇怪, 但係如果Minnie 做出Goofy 或者巴斯嘅動作, 就會好唔妥, 呢個就係Character 同Mascot 之間嘅分別.
而黎到呢度見到一件好震驚嘅事... 佢地個身係有散熱風扇!! 企埋去完全感覺到佢震!
路過亦見到有一個擴建項目, 係一個5D theater, 號稱世界最大theater 同最大弧形銀幕, 乜都要世界第一就是了, 不過站於一個遊客嘅角度, 只要佢個建築物結構冇危險性, 都可以一去. 而且依家睇返兩年前嘅concept art 同模型, 橫琴呢個park 都靠跟得好足, 呢樣係香港海洋公園仲未做到嘅事. (我仍然接受唔到夢幻水都由最初公佈嘅失落古廟變成玩具蛋蛋呢件事)
海豚表演, 個佈景好靚.
或者呢個畫面可以令到你對大陸團旋風式撤退有更深刻嘅印象. 仲記得白鯨表演full house 到要企走廊嗎?
呢個表演係同夏威夷又或者島國儀式有關... 所以都見到有performer 舞火... 但係仍需加緊練練習... 呢位表演者有好幾次燙到自己隻左手... 佢亦都表現出痛苦... 一個表演者唔專業.. 坐喺前排嘅觀眾會好驚...
Aloha..
海豚表演都同海洋公園差唔多.
而旁邊仲有另一個館睇海豚.
距離最尾個湖上表演仲有大約30分鐘. 呢個時候可以返去入口條商店街shopping, 而我就因為朝早放低行李喺酒店大堂, 所以折返去拎. 呢一樣野大家千萬唔好學, 因為路程比想像中遙遠. 真係差少少就趕唔切返黎.
個show 就... 其實如果你係要趕返香港嘅話, 可以早少少離開.. 因為冇一個好令人深刻嘅畫面... 就係圍住個湖嘅各個園區建築物頂放煙火...
橫琴長隆兩日一夜之旅完結.
後記:
絕對係走detail 路線嘅海洋公園. 同埋擺明就係要起嚟打香港海洋公園. 以展館呢個角度真係贏左. 但係如果係要鬥機動遊戲呢, 咁的確OP 仍然有好大優勢. 最重要係長隆冇保育嘅使命.
以門票黎講... 計埋匯率後橫琴長隆分分鐘貴過香港迪士尼. 所以你話會唔會搶到OP 嘅客源呢? 我相信會搶去較高消費嘅一群. 而且係會去澳門賭錢嘅一群. 但小弟都講過好多次自己對旅遊業嘅睇法, 每個地方吸引遊客嘅原因都係整個package, 冇乜人會好似我地呢班theme park fans 咁單單為一個主題公園而決定去旅行. 所以橫琴就算搶到OP 人流都唔代表黎香港嘅大陸客會減少, 因為大陸人仍然會黎香港買奶粉買藥油買化妝品.
最後就係.. 橫琴長隆係值得一去, 而我最滿意嘅仍然係佢地個Park 所有室內地方都有免費WiFi.
3 則留言:
說實話的確不差誒。。
有些地方很Detail。。不知道Ride如何？
果個冰山激流係會直接係動物區內行,但想等佢開左先一次過玩...
btw,果個水族館dark ride好唔好玩..?
全部機動遊戲唔玩, 怕左大陸野?? 哈哈!!
其實冰山既設施又真係幾吸引!!
發佈留言