2014 公主晚宴

喺今年Star Guest 活動開始之前, 小弟曾經講過今年應該唔會為呢個Program 作出介紹, 但係星級款待當中有一個項目其實就算唔係想玩Magical Moment 都可以當係食餐buffet 咁參與, 呢個就係公主晚宴. (有時Fans 就係咁, 你把口點鬧都好, 都係會繼續參與.) 原本只係諗住食餐飯, 冇打blog 嘅意欲, 但赫然發現呢一個項目同上年有好明顯嘅改善. 所以令到小弟想打呢篇作為一個後續報告

上年嘅公主晚宴非常令人失望, 如果你係唔知上年發生咩事嘅話, 可以click 返入呢篇睇睇. (公主晚宴 - 令人失望的Character Dining Experience)

但係今年嘅公主晚宴由預約嗰一下已經見到園方有聽取過意見 (唔知道佢地係咪有睇過小blog, 可能各位上年曾經參與過嘅朋友都對呢個晚宴作出過建議). 

1. 事先知會場地限制

喺電話中演藝人員已經提醒因場地限制, 公主們唔能夠喺場內周圍行, 而需要企定定喺一個位同你會面, 呢個溫馨提示令到賓客清楚事實同預期嘅分別. 你可以喺呢一下決定繼續參與又或者取消. 俾定心理準備參加者, 係非常成熟嘅處理手法.  

2. 不限時會面

上年公主們只係喺席間出現一次, 場內賓客需要排隊同佢影相, 但因為時間有限, 所以每一檯只能同公主見面大約一分鐘時間, 呢個安排並唔係Meet & Greet, 而係當公主係一個影相佈景板; 而今年園方安排公主們出黎兩次, 時間充裕好多, 小朋友都有時間同喜愛嘅公主傾計. 如果公主可以一出場時巡場一次, 咁成件事就完美了! 

單單Character 方面嘅安排已經有顯著嘅進步, 餐飲方面又如何? 

3. 清水無限供應

上年晚宴為左sell 餐飲, 所以冇提供清水, 而今年每個位置都放左杯清水, 晚宴期間亦會refill. 

4. 餐飲糖水分開上

標題已清晰表明. 其實上年感到最奇怪嘅地方係顯露出不同職務嘅演藝人員欠缺溝通. 今年見到改善

5. 演藝人員效率與禮貌

同上年完全唔同晒, Disney Parks 嘅表現. 極滿意. 

6. Magical Moment (1)

上年一篇小弟有一段欲言又止, 其實係想講Magical Moment 嘅小禮物, 話說上年做完問卷調查之後每台會派一個襟章, 但係呢個舉動對於一台有多於一個小朋友嘅家庭係非常難堪, 因為唔知可以俾邊個. 今年入座時已放有貼紙, 一人一張. 雖然只係一個好細微嘅舉動, 但背後係表現出園方嘅細心. 

7. Magical Moment (2) 

因應生日嘅小朋友, 仲會送上朱古力蛋糕. 其實蛋糕唔係重點, 重點係上面有公主decoration 嘛. 不過冇相. 

隨相一堆. 場地一覽, 上年食物區都係室內, 而由聖誕開始就移師到外面半戶外位. 咁入面座位空間就更寬敞

甜品一覽, 其他食物其實都係Resort 內常見嘅, 所以唔多影.

後記:

最令Fans 感動嘅事莫過於見證樂園成長. 樂園嘅成長唔單止講緊面積嘅擴展, 而係處事手法同態度等等嘅軟件.

小弟不求會收到樂園嘅小禮物, 因為我唔會捨得用而又冇位放. 而且收禮物都不及見到樂園改善咁振奮. 希望園方會繼續切實令到呢個樂園繼續邁向一個真正嘅Disneyland. 亦希望會多多留意各位Fans 嘅意見.