光影畫筆與神秘畫像.

近日樂園各處突然出現一批神秘畫像, 呢批畫都有一個共通點, 就係畫框底部都有一個米奇頭形狀嘅接收器, 據聞呢幾幅畫其實係會同光影畫筆有一個互動.

聽講呢批畫將會喺今個星期雪亮聖誕活動開始時正式啟動, 向前推算, 當中涉及要決定畫嘅數量, 決定擺放嘅位置, 動畫嘅構思同制作等等, 以大家所認識嘅香港迪士尼, 兩個月嘅時間係唔足以由零變完成品. 所以估計呢批畫係更早遠之前嘅決定. 可能連架花車都未整好之前已經開始製作. 所以冇預計呢支筆喺巡遊嘅效果並無想像中咁理想...

個人認為香港迪士尼可以引入呢批咁magical 嘅畫像係非常明智嘅決定, 但同時間我亦擔心呢批畫唔會存放得太耐..... 佢地嘅出現係因為支光影畫筆, 而支畫筆嘅出現係因為Paint the Night Parade 個Show Stop.

Paint the Night Parade 正式出街都有一個月嘅時間, 原先呢個表演係為左延長賓客逗留喺樂園嘅時間, 但係過左Halloween event 後, 其實PTN 並無想像中咁留得住班Guest, 要提早離場嘅都係會喺入夜前離開...

而留低睇PTN 嘅賓客, 又有幾多人會手持呢支光影畫筆? 就現場所見就唔太多... 部分原因係冇Cast Member 教點樣用支筆, 而更大原因係冇乜幾多人會為左睇一次show 而買支筆, 所以除左Fans / MA 會員會拎住之外, 唔多遊客會加入...

似乎園方一早洞悉到呢件事, 所以引入呢批畫像. 希望為賓客提供多一個購買理由. 但呢支筆始終係為PTN Show stop 而設... 令人擔心嘅係Costume 同支筆嘅互動唔顯眼. 如果HKDL 唔正視同解決呢個問題, 長此下去, 呢個Show Stop 可以捱到幾耐? 如果支筆喺個巡遊度已經冇左作用, 咁支筆仲有冇存在價值? 咁支筆冇左, 批畫係咪都要全數撤走?

發展支筆嘅其他可能性係一個值得討論嘅問題... 引入畫像係一個正確嘅決定, 但係擺放嘅位置有待加強, 售賣畫筆嘅商店內放置一兩幅係必需 (據官方資料, 百貨店, 童話藝坊, 安仔玩具箱同太空驛站都會搵到畫像) , 因為咁先可以俾Guest 試到個效果, 增加購買意欲. 但從另一角度睇, 人人拎住支Sample 就玩得, 咁就唔駛買啦. 所以樂園其他地方都有需要放置互動畫像.

根據官方資料, 現時動畫藝術廊同火箭餐廳都有置入畫像. 但希望會繼續擴展滲入更多地方, 例如Attraction 嘅等侯區.... Mystic 同Grizzly 條queue 有好多畫像同相片, 係一個好好嘅地方藏入互動畫像. HKDL 欠缺Interactive queue, 如果排緊隊嘅時候見到前面個人拎起支筆令到Lord Henry Mystic 郁, 應該都會幾吸引.... 某程度上都幾一舉兩得.

其他值得考慮嘅發展可行性...

1) 將支筆發展成好似Epcot Kim Possible / Agent P 咁嘅一類任務game. 但支筆外表睇黎唔似有儲存同識別能力可以推動並完成一個故事任務...

2) 如果好似Diagon Alley 支Magic Wand 一樣令到街上同櫥窗嘅道具郁動又可唔可以呢? 不過呢個發展需要投放較多資金去製造機動道具.

既然決定要投放資源落去, 就要好好諗下未來嘅出路. 又或者考慮下一步嘅步署.