我一直都好想見識下HHN 嘅威力, 因為自從香港迪士尼喺Halloween 期間加入鬼屋後, 就開始對於內部裝修得detail 嘅鬼屋好感興趣, 但係海洋公園嘅鬼屋唔夠detail, 香港迪士尼嘅鬼屋唔夠驚嚇, 總有唔夠喉嘅感覺, 每年網上見到幾個Universal Studios 嘅Halloween 都好似好好玩咁, 一直都有呢個心想去試一試, 終於今年有機會了!
懷住緊張嘅心情, 一步步接近聖淘沙, 不過首先要去酒店放低行李.
入聖淘沙有幾個不同途徑, 上次有帶大家坐過吊車入去 (當時仲有Angry Bird 做主題). 而最多遊客選擇嘅就係乘搭單軌列車Sentosa Express. 不過你亦都可以沿住海邊行Sentosa Boardwalk 由市區行入去, 不過呢條路只會喺Weekend 開放.
而聖淘沙島上酒店住客可以享受一程免費Sentosa Express 嘅優惠 (只要唔離開個島, 其實只得市區入閘處係需要飛, 島上嘅站都係免費任搭, 呢個安排可以令到遊客願意多留島上消費) 不過就要去到站外嘅Customer service 先可以兌換.
準備上車了, 原來除左USS 有Halloween 活動外, 島上仲有更多鬼屋提供俾大家玩, 但當然都係要另外收費了...
小弟入住嘅酒店喺Sentosa Express 嘅第二個站, 所以會經過Universal Studios 嘅backstage, 見到其中一間鬼屋嘅背面啦! 好緊張呀! USS 每年都會用backstage 空位搭建臨時鬼屋, 所以呢個另外售票嘅event 係唔會影響到影城日常運作, 冇設施因為Halloween 活動而需要臨時關閉, 但就因為呢個開放backstage 嘅安排令到影城大左好多.
呢間Movenpick 酒店, 喺Universal Studios Singapore Grand Opening 嘅時候小弟第一次入住, 當時呢間酒店只係試運期間, 有半座建築物都係空置. 所以當年嘅房價比依家更平. 依家雖然係貴左, 但因為基本上每一項細節都令到我幾滿意, 所以每次黎都會繼續揀呢間.
酒店外觀同房間佈置都好靚同舒服, 如果唔係有隻魚尾獅像喺隔離, 呢間酒店冇可能會咁平...
就係呢隻Merlion... 話說呢個島上有呢個37米高嘅新加坡標誌, 1995年經已屹立喺島上, 所以都可以話係聖淘沙島嘅原住民. 而Sentosa Express 嘅呢個站只係得呢個Merlion Statue 同埋Movenpick 酒店兩個主要嘅設施, 所以人流非常低... 要入住呢間酒店嘅遊客就要有心理準備... 日光日白已經夠嚇人... 夜晚係更得人驚.
個人覺得呢間酒店撇除個魚尾獅之外都尚算住得舒服. 大家下次去聖淘沙都可以考慮一下
入影城了, Halloween Horror Nights 活動會係另外購票入場, 而且會清走所有day guest, 所以日間門票係完全享受唔到Halloween, 唔可以好似HKDL 咁一張飛玩埋黑色世界. 但係decoration 就唔會拆走, 可以喺日頭影下相.
今年Halloween 嘅主角 - 軍官Jonah Goodwill
日頭睇鬼屋入口真係冇乜氣氛.
今次行程有一個小驚喜, 就係突然獲得一套紀念版門票, 但係為左唔為當地員工帶黎麻煩, 就唔透露詳情了.
以芝麻街為門票設計, 係因為Sesame Street 係對上一個擴建項目. Spaghetti Space Chase, 簡稱為Elmo ride, 我覺得呢個ride 有好多驚喜. 雖然佢係欠缺Disney Audio Animatronic 專利技術, 但係正因為佢冇呢種技術而轉而加入更多其他不同嘅特別效果, 所有特效結合之後係比迪士尼好多經典dark ride 更好玩. Elmo Ride 只得USS 獨有. 值得玩多幾次.
Sesame Street 另一個設施, 取代Monster Rock 呢個theater show. 其實就係上年New York 區域上演嘅street performance, 將佢搬入theater. 一個適合小朋友睇嘅表演. 一眾角色會喺表演尾段走入觀眾席同你影相.
我覺得呢個show 並唔錯, USS 開幕時嘅設施同HKDL 剛好相反, 呢邊冇乜俾小朋友玩嘅設施, 所以家庭客黎到呢度嘅話較少選擇, 加入芝麻街Ride + Show 係好事.
Transformers 都係必玩嘅設施, 雖然我仍然覺得Spiderman 好玩d...
Madagascar 都值得再玩, 睇到呢度或者你會發現.. 小弟對於USS 嘅擴建項目有好高嘅評價... 但呢個Boat Ride 同Elmo Ride 一樣, 都係有好多effect 去襯托批Figure. 而且入面環境都係detail. 只不過時間長左少少...
而下一個設施, 以Shrek 衍生作品Puss in Boots 為主題嘅過山車, 喺Far Far Away 嘅盡頭... 公佈時預計今年年尾開幕, 但照依家進度... 佢就算唔做Testing 都趕唔及年尾開幕呱.... 更多資訊敬請繼續留意.
原本今次買Day Ticket 係為左睇一次只有weekend 先上演, 而我又從未睇過嘅Hollywood Dream Parade. 但係因為Halloween 大型decoration 阻礙花車行駛, 所以喺呢段期間parade 暫停演出...
Shopping 時間. 呢度真係好集中.... 一間shop 只賣一個主題嘅商品, (而近入口街道嘅大型商店就以商品種類為分類). 唔知係咪版權問題, 所以呢邊欠缺好多受歡迎嘅角色商品 (如Simpsons) 亦可能因為呢個原因, 呢度嘅商店先可以咁集中只賣一個主題嘅商品...
差d 唔記得講呢件事, 就係依家Sentosa 做緊優惠推廣, 但係唔只得門票有優惠, 就連喺USS 入面消費都有折扣, 依家用Mastercard 喺影城商店內簽帳可以有85折優惠, 就係呢個優惠令到我有少少失守了....
新加坡嘅天氣都係熱.. 反正日場同夜場之間有個空檔時間, 就返酒店沖個涼再出發. 其實Halloween Horror Nights 會喺晚上七點半先開始, 大約七點會開始放人入去. 所以假若你唔係第一次到訪USS 而又覺得你已經玩晒D Ride, 可以喺呢個空檔時間出去食個飯.
對於今次呢個Halloween event, 出發前做過少少資料搜集, 發現有朋友話每年HHN 都因為太受歡迎而會出現人山人海嘅情況, 到最後入到場都係排隊... 所以小弟都係決定用錢買時間, 買左張Express. 用左呢個express 都要玩到11點先玩晒... 真係唔敢想像到底如果冇買express 嘅遊客有冇機會玩得晒所有鬼屋....
入場後發現遊客塞晒喺Hollywood 大道, 原來呢度將會有一個開幕儀式. 如果你有留意到今次Halloween Horror Nights 嘅故事, 就會知道今年主題係一個軍官上台執政統治一個城市. 但係冇人知道原來呢個軍官係一隻魔鬼...
呢個開幕儀式開始於Hollywood 大道, 觀眾頭頂上有個大電視, 直播緊街道盡頭嘅就職典禮, 而新聞就直播出大批民眾聚集喺大道示威, 反對Jonah Goodwill 上任. 原來遊客已經被賦予一個示威者嘅角色...
Jonah Goodwill 喺爭議聲中到場.. 反對聲音此起彼落, 突然現場傳出鎗聲, 原來街道上某座建築物上藏有狙擊手, Jonah Goodwill 應聲倒地, 但用最後一口氣喺手上發出火球射向狙擊手....
然後一隻魔鬼飛上半空... 呢個就係Jonah Goodwill 真正面目! 佢宣佈呢個城市正式由佢接管, 而且佢已經呼喚左一眾妖怪由地獄衝上黎...
今次event 嘅Halloween 元素分佈圖. 都係集中喺影城嘅右邊, 所以遊客都會轉右進入New York 大街...
自由神像嘅殘骸, 撞毀嘅汽車, 由地底插出地面嘅地鐵車箱, 一眾魔鬼.... 眼前嘅呢個世界已經唔再係我地熟悉嘅城市..... 當中仲會見到部分生還者嘅惶恐同被魔鬼虐待嘅畫面 (場內燈光太黑, 又因為遊客太多嘅關係, 所以影唔到相, 今次呢一篇會用到大量官圖)
喺New York 呢個出名有多個表演項目嘅大城市, 依家都有個劇院被魔鬼佔領, 舉行一個怪誕表演.... 中後會有位「觀眾」被邀請上台後被迫做出高難度瑜伽動作.
而呢個劇院嘅附近仲有一條小路進入另一個小型嘅小丑帳篷劇場... 呢間鬼屋係以螢光 x 3D x 小丑為主題, 小丑係一個心理關口, 呢個世界有好多人其實都好驚小丑, 所以如果佢地要玩呢間鬼屋嘅話, 有機會係四間入面最驚. 而我呢... 因為小弟並唔驚小丑, 所以只係覺得呢間鬼屋入面做得好靚. 螢光方面都做得好出色, 但係原來佢副眼鏡並無想像中咁3D, 反而戴左之後會令到你好暈...
對面係一個Scare Zone, 除左有鬼屋外, USS HHN 仲有幾個Scare Zone, 普遍都係街鬼喺街道上行黎行去同你影下相, 但係呢個scare zone 就係一間戶外嘅鬼屋, 要排隊進入, 亦有實施人流管制. 故事係講述呢個城市有好多小朋友突然唔見左, 並有傳說指呢班小朋友被一個可以由衣櫃穿梭到不同世界嘅魔鬼擄走, 呢隻魔鬼叫做Bogeyman. 而呢個walk through 就帶你進入呢個衣櫃背後嘅世界...
呢個鬼屋式嘅戶外scare zone, 因為唔係室內, 所以聽唔到隔離通道遊客被嚇至尖叫嘅聲音, 相反係全程都好寧靜... 只係偶然會聽到遊樂場生韆鞦因生鏽而形成嘅刺耳摩擦聲... 但係呢度有好多鬼會突然撲出黎. 驚嚇程度比頭先小丑鬼屋高.
Jing's Revenge, 一件校園欺凌事件, 一個自殺嘅女學生鬼魂, 一次報復, 只係一個好簡單嘅故事, 但係做出黎嘅效果非常強烈, 以學校為主題嘅鬼屋差唔多個個park 都玩過, 但係今次出現大量血漿同死狀恐怖嘅屍體...
製作團隊理解大家都估到鬼屋喺轉角嚇人嘅招數﹐ 所以故意喺每個轉角放置道具屍體... 當你放下戒心就會有隻真鬼撲出黎. 當然真人同道具兩秒後仍然係會認得出, 但第一下真係可以嚇得到.
呢間鬼屋其餘嘅嚇人位都係同普通鬼屋差唔多. 而且係四間鬼屋入面通道最窄嘅一間, 以decoration 同壓迫嘅氣氛取勝.
Mati Camp, 以軍營為主題, 一個魔鬼軍官 (唔知同Jonah Goodwill 有冇關係呢?) 以殘酷嘅手段訓練士兵, 頂唔順而被淘汰嘅人會為折磨至死, 長期處於緊張嘅狀態下班士兵都變得瘋癲... 呢間冇乜場景令到我留有深刻印象, 只係覺得好黑.
另一個scare zone - Scary tale. 被扭曲嘅童話故事, 化妝造型上做得好好, 因為冇人突然撲出黎, 相比之下呢段路唔係太驚.
The Lab, 以變種生物為主題嘅鬼屋, 本身我都覺得呢間係唔驚, 將人類研究成為變種生物嘅基地, d 鬼嘅造型並唔錯嘅, 但因為本人覺得變種人好似好遙遠, 所以唔太驚. 但係有一個幕我真係嚇親....
呢幕試管實驗室... 睇落去完全唔驚... 又見到邊幾支試管有出入口... 擺明知道係演員啦... 點會嚇到我呢? 但估唔到前面會截住條隊迫你停留喺度... 原來呢個場景有show mode.... 會突然熄晒燈.. 連聲效都冇埋. 經歷兩秒完全漆黑同寂靜後突然再出現刺耳巨響同著返燈, 怪物已經企喺你隔離. 呢一幕印象好深刻... 亦都睇得出製作團隊嘅心思.
除左鬼屋之外幾乎所有設施都會正常開放, 但因為呢個活動重點係鬼屋, 所以冇乜人會排ride, 而同時間手持Express 嘅遊客都可以以特快通道上ride, 所以結論係HHN 買Express 係非常慳時間同無敵.
Halloween Horror Nights, 真係好好玩! 各位如果有機會十月到訪任何一個Universal Studios, 記得要玩HHN 呀!
沒有留言:
發佈留言