喺呢度嘅行程冇咁緊張, 所以呢一朝訓到自然醒. 酒店住客可以喺餐廳享用早餐. 話說酒店嘅底層係一間西式麵包店, 都幾多人幫襯. 呢度裝修真係好唔似馬來西亞...
底層係普通客人可以進食嘅餐廳同麵包店. 而酒店住客就會上到閣樓.
呢一朝嘅早餐, 牛角包熱狗, 但中間唔係蛋黃醬或者沙律, 而係炒蛋. 出奇地配合. 整個氣氛都好悠閒,
享受完呢個咁豐盛嘅早餐, 收拾完行李繼續探索呢個城市. 發現呢個國家雖然並非咁發達, 同埋並非無障礙城市, 但係地方尚算乾淨, 街道上甚少見到垃圾. 人民教育同質素真係非常好重要.
另一個發現係呢個國家有好多朱古力店, 並唔係講緊專賣高檔朱古力嘅名店, 而係一間商店入面只賣朱古力, 不同牌子同款式多達過百款. 雖然全部都係包裝出售, 但部分嘅朱古力店都會提供試食. 翻查資料後發現原來南洋呢邊盛產可可豆並出口至全世界. 所以朱古力都係一大產業. (之後發現.... 今次旅程真係買左好多朱古力做手信.)
差唔多又夠鐘食飯, 要上觀光塔食buffet. 話說之前講過吉隆坡Twin Towers 甚得遊客寵愛必定會上觀景台. 但上網做功課時發現吉隆坡仲有另一座同雙子塔差唔多高嘅觀光塔, 而上面仲有一間360度旋轉餐廳. 所以決定黎呢度邊食邊飽覽呢個城市嘅風景.
搭Monorail 嘅話可以喺Bukit Nanas Station 落車, 然後沿指示去到山腳就會有Shuttle 到觀光塔嘅入口.
呢架就係shuttle, 坐滿就開.
官網建議早一日book 定位, 小弟係早一晚臨訓先book, 星期五嘅lunch buffet 入座率都過50%. 當然呢度有分Lunch, Tea 同Dinner buffet, 衡量價錢後覺得Lunch 應該會較好. 有興趣嘅朋友可以入官網睇睇價錢: https://www.menarakl.com.my/
其實成座塔都似澳門觀光塔, 連呢間360 度旋轉餐廳都一樣.
食物款式選擇唔及LEGOLAND 個早餐. 但要盡試嘅話都絕對夠飽肚.
大約兩個鐘轉一圈
食完繼續行街, 其實係想搵下有冇咩係香港或者澳門唔會有嘅商店可以同大家介紹一下, 基本上大約香港都會有分店, 除左呢間. DC Superheroes Store
話說呢間專賣英雄人物嘅服飾店除左香港之外好多地方都有分店, 澳門都有, 仲已經搬左一次舖, 但冇乜幾多間分店有呢間咁大規模, 而且其他分店最多都係放出角色嘅Figure, 但係呢間就放有電影戲服, 演員簽名, 大量玩具收藏品. 其實更似一間博物館.
之後都係繼續周圍行, 但發現唔到得意有趣嘅商店, 就唔喺度向大家介紹了. Chinatown 同廟街一樣.
馬來西亞行程結束, 下一站 - Universal Studios Singapore
沒有留言:
發佈留言