2013 特別企劃 - 準備篇 (1)

2013 特別企劃黎到第三篇~ 過去呢半個月小弟一直忙於籌備呢個旅程種種雜項~ 都係時候賣完關子~ 申請左美國簽證當然唔會只玩一個地方~ 但今次呢個旅程先會去西岸~ 想睇東岸之旅嘅朋友可能要等多一陣~ 小弟可能好快就會再計畫去埋東岸~ 

今次行程計畫非常倉促~ 希望無損當中質素~ 大致上已經決定晒所有野~ 幾樣準備事項想同大家分享一下~ 分成兩篇~ 呢篇係大路野可以適用於任何旅行目的地~

1 - 提款咭
去到外國旅行錢固然係非常重要... 但如果唔想帶咁多現金喺身~ Credit Card / 提款咭會係你一個好好嘅良伴~ 不過由今年初開始記得要喺旅行出發前先通知銀行設定海外提款功能!!

一般銀行海外提款都會收手續費, 每次十數至數十元港幣不等~  而以下呢間銀行提款咭係可以唔收service charge 地容許你喺外地提款~ 當然每日匯率都有所升跌~ 但假如你係去一啲貨幣升跌較少嘅地方~ (例如美國)... 喺呢間銀行開左個account 就唔需要擔心帶太多cash 喺身啦~ 

2 - 保險
旅遊保險就當然要買~ 但坊間上有好多旅遊保險都唔會保你遺失 / 損壞相機或手機~ 自從我親眼目睹同行人士唔見過相機嘅慘痛經歷後~ 深明保險保你個人安全外之餘都要搵一間可以保埋呢類電子產品嘅plan~ (都係買個安心姐~ 唔係話買左就可以唔見...) 而今次特別鳴謝友人去代勞處理呢件事~ 有冇發現每個人身邊都會有一個做保險嘅朋友~? 呢種時候最好就幫襯朋友啦~ 認真講句... 呢個旅程整個planning 我都碌盡人情咭搵左好多朋友幫手~ 

3 - 機票
機票方面.. 依家網上面有好多不同格價網站可以幫你搵到平機票... 例如Priceline, cheaptickets.hk 等等... 航空公司有時都會自己做promotion~ (某航空公司每星期都會推出特價機票~ 但唔係人人都可以愛惠隨時出發..) 如果閣下係一個懶人~ Travel Agent 絕對係你好幫手! 而最理想嘅當然係有朋友幫手搵平機票~ 今次時間緊迫~ 小弟托朋友代勞搵左平機票! 正呀!!

4. 行程歐美多個旅遊熱點都會有Local Tour 服務~ 而且基本上每個Tour 都會斬得好開 (例如一至兩日) 等你可以任意砌出獨一無二嘅行程~ 如果你對自己英語冇乜信心~ 都可以搵當地華人旅遊網~ 但無論訂咩都好~ 做決定前最好就係上網search search 評價~ Trip advisor 係一個口碑較好嘅網站~ 會列出每個地方Local Tour 行程收費等~ 最重要係有好多traveler review~ 絕對幫到你手~