除夕倒數派對取消了??

今日小弟係呢個blog 度講DLP Halloween 正日當晚有一個只此一次ge 表演~ 話今晚仲有d 關於HKDL ge 事想講講~ 就係講呢件事.....

原本呢個消息我都想一如以往扮唔知~ 但係好多知道呢個消息ge 網友們都希望我會透過網上面呢個平台講出黎請求HKDL 趁仲有得改變主意之前.... 唔好取消呢個一年一次的Count Down Party~ 所以.... 都係要講la~

聽聞事緣係上年Countdown party 太過冷清... 臨尾到12點果陣同平時weekday 等收park 一樣冷清....... 可能係為左節省成本所以今次取消~ 當晚將九時正閉園~

但係HKDL 唔好忘記.... 除夕呢個日子... 只係俾最貴果隻Annual Pass 入場~ 有好多好想入場ge AP 都因為呢日block 左所以冇得入~ 而唔係唔想入~

HKDL 每次都係睇個結果去構思下個活動... 有錢賺就繼續做~ 冇錢賺就cut~ 但係點解唔諗下造成呢個結果ge 原因??? 你地有冇花過心思去諗計吸引人??? 唔受香港人歡迎... 係咪應該要諗下香港人想要乜先~?

上年除夕活動好似只係用返Royal Christmas Ball 個stage 同埋係Tomorrowland 搭建多一個stage 俾人跳舞同聽歌.... 呢個就係問題所在... 你地依家唔係run 緊一個Disneyland~ 而係一個商場~ 既然你搞到個party 同出面街一樣.... 點解d 人要俾錢入HKDL 倒數而唔去時代廣場唔去廣東道??? 去廣東道都仲可以去睇下明星~

冇錯!!! 就係明星!! HKDL 點解唔搵明星坐鎮?? 唔係講緊重金禮聘天王級歌手影帝名媛出席~~~!! 邊個明星最match Disneyland?? 你公司旗下個個迪士尼人物都係明星~! 你搵個dancer 係度跳舞邊個識你先?? 你要人入黎都要製造一個引人之處ga~! 要有自己特色ga!!!

Stitch 同Donald 呢個例子講左好多次~ Stitch ge 商品受歡迎除左係因為佢本身真係多人鍾意之外~ 有冇諗過係你其他人物ge 商品造型質素冇佢做得咁好而影響銷量先?? (我好想買Donald 公仔~ 但佢個咀真係買唔落手!!!!) 你地一直都冇考慮到個原因.... 只係睇到表面個結果而不斷谷大Stitch 人氣~ 繼續忽略Donald 個咀~ 呢個係病態惡性旋渦~ Donald 終有一日會被捲走永不超生~

冇人去上年Countdown... 係因為活動唔足以吸引到人買飛入場.... 針對呢個原因的解決方法有兩個:

一) 學DLP Halloween Party 諗一個充滿Disney 特色的show~ 只此一場!! 呢個就係selling point~ (花費係呢個show 同延長開放所帶黎ge 支出)

二) 開放12月31日俾所有AP 入.... (又或者你繼續派飛~) 唔需要花心神諗show~ 繼續上年d 唱歌跳舞party.... 加埋characters 出黎同大家影相就足夠~ (花費係延長開放所帶黎ge 支出)

冇錯仲有第三個方案~ 就係依家HKDL 擬定ge 方案~ 直情唔搞!! 乜支出都慳返~ 但開左個頭一年唔搞..... 就好難可以keep 住繼續搞落去~ 班fans 今年冇入到而發現有其他好玩地方.... 下年你再搞返佢地都未必會返黎!!!

我聽到有人因為12月31號玩唔到count down 所以想續證幫襯你買最貴隻AP.... (當然仲因為其他尊貴待遇) 依家cut 左除夕show~ 係咪又少左個原因要人幫襯你呢??

到底金民豪係以乜野方針領導香港迪士尼樂園團隊??